韓國首爾嘅文浯先（문오선），憑住 12 年嚟學習廣東話嘅經驗，用 4 年時間寫成首部《廣東話 韓文詞典》，等韓國人學廣東話唔使再無從入手，從此有法可依。
細睇文先生公佈嘅詞典，可見取材別具匠心。當中不乏韓人旅遊、生活常用嘅廣東話詞語，例如張字頭一欄，由地名「張家界」、成語「張冠李戴」，到明星「張國榮」、「張學友」都有收錄到，寧舍方便韓人。
文先生所編字典，連張國榮都有收錄。
至於粗口、本地術語，呢本詞典唔單止有收，仲提供埋生鬼例句，而且用上香港字型。例如講到「戇鳩」一詞，就有以下對話示範：
（甲）我諗我靚仔過郭富城
（乙）戇鳩！
例句生鬼有趣
文先生喺《100毛》訪問話，佢因為睇《英雄本色》開始鍾意香港文化。但 2006 年自學廣東話時，發現首爾嘅書店冇任何廣東話、韓文嘅詞典，唯有靠日語廣東話字典學習。於是佢立志要寫一部畀韓國人學習廣東話用嘅詞典，努力 12 年，終於寫成。
佢話本字典而家喺韓國有得賣喇，仲可以網上郵購到香港添！