統計處今天(19日)公布資料，大陸新移民識講廣東話嘅比例下跌咗成15%至68.9%。分析指，大量唔識廣東話嘅移民湧入，將造成文化衝突同埋危機。
民政事務總署於去年第三季訪問9,329名大陸新移民。資料顯示，大陸新移民識講廣東話比例由2008年第三季84.3%，降至去年第三季約68.9%。去年持單程證來港的新移民有42,300人，較2017年嘅4.7萬人減少4700。
港語學召集人陳樂行指，雖然香港九成人母語仍然係廣東話，但部分新移民聚居嘅地方，例如北區、天水圍嘅校園語言都受到衝擊。當區多份校務報告都不約而同咁指出，師生只能用普通話溝通，缺乏高層次交流，成為首要嘅教學問題。
即使係擔當推普舵手、位於天水圍嘅「普通話創意科技小學」，都不得不承認「以普通話為教學語言，影響高層次師生交流」。
佢建議，政府應該喺移民政策把關，仿效外國設立粵語考試，確保移民適應本地環境；同時亦應該盡快確立中小學嘅正規粵語教育，確保學童可以喺正規教育掌握本港最主要語言——廣東話。