大灣區規劃綱領昨日出爐，當中提及「鼓勵港澳青年到內地學校就讀」，而浸大正係第一間受國家教育部特批，到大陸（珠海）開設嘅領頭羊。山神調查發現，珠海版浸大唔單只同港版浸大出同一張Cert，仲竟然係無普通話畢業門檻。

珠海版浸大一直都以證書與浸大一模一樣作招徠，喺本港多個教育展覽中展示同港版浸大一模一樣嘅證書，即使廣受批評仍然用同樣銷售手法。唔單止證書一樣，珠海嘅學生甚至會到港版浸大行禮畢業。

不過大學教育資助委員會轄下質素保證局2016年報告指出，浸大珠海分校的畢業證書內容有欠清晰，未有清楚列出學生於何處就讀課程，有別於香港浸大頒發的證書，有清楚列明學生於「香港浸會大學修讀」的字樣。其實2013年已有人於討論區中呼籲其他文憑試畢業生報讀該校，並指該校有畢業生成功於著名會計師事務所、銀行及企業任職，前景吸引。該網民並在標題中強調「張cert（證書）一樣」，懷疑鼓勵學生以此混淆視聽，裝作香港浸大畢業生。

此外，浸大臭名遠播嘅普通話畢業門檻，並無喺珠海分校出現。查珠海分校網站並無提及相關安排。根據該校《本科生課程手冊及學士學位課程條例》，畢業要求包括學校基本要求、專業要求、學校出勤要求、學分和平均績點（GPA）要求，亦無提普通話。該校更不設如港版浸大語文中心咁嘅考核部門。

浸大前校長吳清輝出任該校校長，吳本人親中立場鮮明，他過去曾任港區人大代表、臨時立法會議員等公職，亦以迫害杜耀明老師在內嘅「浸大六君子」聞名。