「如果要港人愛國…」歌手關淑怡微博撰文:「敬請尊重廣東話!」

香港歌手關淑怡尋日喺微博用正體中文撰文,力撐廣東話。佢劈頭就強調:「請尊重香港音樂人和歌手,廣東省都是中國的一份子,廣東也是一個主要的省份,廣東話也是中國的方言。」

佢指出,港人都學緊普通話,都希望中國每部份嘅人,都接納廣東話為中國人的一種地方語言,「港人是說廣東話,這是廣東人的地方語言,如果要香港人愛國,香港是否也是中國的一部份,敬請也尊重廣東語言,我們一起進步,必須要接納中國每省份的地方語言。」

關淑怡同時強調香港人係只係為同大陸人溝通而盡量講港式普通話,但係,「港人並不會放棄廣東話……因為我們的目的是溝通!跟你們溝通的橋樑就只有語言。」

雖然唔知關淑怡突然寫文嘅原因,但有關言論已經受到港中兩地廣泛關注。有網民指出關淑怡最近喺東莞應邀做克勤演唱會嘉賓,可能喺工作上受晒大陸人氣,所以忍唔住為港人、為粵語挺身而出。無論點都好,喺大陸微博寫篇文,真係敢言又夠薑啊。