自從香港語言學會四月發布粵音朗讀（Cantonese Read-Aloud Test）測試，大批市民向本會查詢會否報道報名詳情，而且名額搶購一空。尤其係今次推出嘅定價只係IELTS嘅八分一（即$250），又會對見工，尤其係做新聞傳播、教育或者其他行業有幫助，試下又何妨呢。編仔就真金白銀親身試過，報名CRAT原來好簡單，仲不限國籍年齡。一齊同大家直擊睇下。

首先入去香港語言學會個網站（lshk.org)，喺「Events」一欄揀「Cantonese Read-Aloud Test Registration」就會搵到張報名表。你亦都可以撳「Cantonese Read-Aloud Test」睇下有關考試詳情。以下為朗讀試內容簡介

朗讀試內容分三大部份︰四十個單字、三十個多音節詞彙、及篇章，首兩部份以準確度評分，篇章部份則加設流暢度、口音純度兩項準則，總成績以甲、乙、丙、丁四個等級評定（以甲等最優秀）。

兩篇考核篇章隨機從學會制定嘅〈粵音朗讀測試香港中文篇章列表〉及〈粵音朗讀測試粵文篇章列表〉中抽出，確保評核內容同時涵蓋書面語、口語兩種語體。篇章每篇約 250 字，範圍涵蓋多種文體，例如散文、小說、科普文章、新聞等。由於篇章來自香港大眾文化及議會文件，內容具有香港特色，例如香港地名、習慣讀音等都係考核內容嘅一部份。

如考生對香港文化有基本了解，並掌握相關詞彙讀音，會有助於朗讀試中考取較好成績。

朗讀試嘅語音評核標準係以實際應用為準。有別於坊間經常強調嘅「正音」、「古音」（例如「時間 : gaan3」讀作「時奸 gaan1」、 「貓 maau1」讀作「苗 miu4」），朗讀試讀音標準乃係根據學會嘅學者對香港粵語深入持續嘅研究訂立，著重與時並進、實用嘅讀音。學會指，假如一種語音演變喺社會上得到廣泛接受，從語言學角度會視之為自然現象，冇必要加以排斥。其中部份俗稱 「懶音」嘅讀音，例如「你 nei5」讀作「里 lei5」等，已經係存在咗超過一百年嘅變化，朗讀試會接受；但社會並未廣泛接受嘅讀法，例如「恆生 hang4 sang1」讀作「痕身 han4 san1」等，則不獲接納。

留意返第二期測試將於11月23日（星期六）舉行，睇下你自己得唔得閒先好報啊。

 

基本上只係問簡單聯絡資料，然之後去最底撳「提交 Submit 」就得。咁就會去Paypal 畀錢頁面，留意返係用信用卡畀錢嘅。

撳右手邊「Paypal結帳」個掣，填晒信用卡資料撳確定。

撳「Back to store 」，就會發現之前個登記表會顯示「報名已收到，多謝！」

幾分鐘之後，Paypal都會寄多個電郵確認收款，咁就夠晒穩陣啦。