天行健，君子自強不息。呢句名言相信大家都非常熟悉，而且大家都知道佢既出處，係來自易經。準確來講，係來自周易中既《大象傳》。所謂《大象傳》，係後世既經師對周易六十四卦卦名既解釋。全句係：「天行健，君子以自強不息。」大家對呢句既解釋都無太多既異議。唐代既《周易正義》咁講：「行者，運動之稱，健者強壯之名。」又講：「唯天運動日過一度，蓋運轉混沒，未曾休息，故云天行健。」大意就係話天體運行剛健，因為日月星三光既運行永無止息，所以君子要效法天體既運行，就要努力不懈，自強不息。現代黃壽祺對《大象傳》既譯文係：「天的運行剛強健勁，君子因此不停地自我奮發圖強。」
攝於香港中央圖書館
但係呢個解法係咪完義無缺呢？其實就唔係。隨住研究方法既進步，以及地下文獻既出土，好多舊有既學說都一一受到新方法新材料既挑戰。我喺呢道開宗明義，傳統解法有兩大錯處。一，天行，唔係解作天既運行，正確解法係天道。二，「天行健」之「健」，唔係剛健咁解，正確解法來講，「健」係卦名，係「乾」既通假字。
所謂「天行」，唔係「天既運行」，而係「天道」。清代王引之既《經義述聞》有非常詳細既論證。我只係舉其中一個。《國語．晉語》：「歲在大梁，將集天行。」韋昭《注》：「集，成也。行，道也。言公將成天道也。」如果想睇論證既全文，可以搵返呢本書，搵唔到本書就直接搵我都得。我寫呢篇文既主要目的，係解釋個「健」字。以下我會用內證同外證內個角度去論證。
一）內證
所謂內證，係指從周易原文出發，比較周易既文例，搵出周易用字既規律。首先，我地比較下乾坤兩個卦既《大象傳》。
《乾．大象傳》：「天行健，君子以自強不息。」
《坤．大象傳》：「地勢坤，君子以厚德載物。」
大家留意到啲咩？坤卦既《大象傳》內文，係包含左卦名，但係乾卦就無。咁究竟《大象傳》應該有卦名，定係唔應該有卦名，定有無都得呢？我地睇埋其他六個經卦既《大象傳》。
《坎．大象傳》：「水洊至，習坎；君子以常德行，習教事。」
《離．大象傳》：「明兩作離，大人以繼明照于四方。」
《震．大象傳》：「洊雷，震；君子以恐懼脩省。」
《艮．大象傳》：「兼山，艮；君子以思不出其位。」
《巽．大象傳》：「隨風，巽；君子以申命行事。」
《兌．大象傳》：「麗澤，兌；君子以朋友講習。」
大家可以睇到，八個經卦入面，有七個卦既《大象傳》，都有包含到卦名。《大象傳》既形式係：「卦象」＋「卦名」＋「道德上既啟發」。只有乾卦唔同。乾卦係「卦象」＋「形容詞」＋「道德上既啟發」。唔單止八個經卦其中七個係一致，就連其他卦既《大象傳》體例都係一樣，只有乾卦例外，似乎唔應該有呢種例外。留意到「乾」同「健」讀音相似，上古音同屬元部，兩個字喺上古只有等同介音既分別。如果認為「乾」同「健」係能夠通假，所以「天行健」之「健」同「乾」都係卦名，係一個絕對合理既推測。
除左周易既內證，仲有出土文獻等等既材料，是為外證，會放喺下一篇文度講，多謝。