浸大販賣畢業生薪酬資訊至大灣區 每份盛惠 $5800

中原人力資源顧問董事總經理周綺萍同佢啲同行有福喇!今年十月,香港浸會大學將聯同華南理工大學、香港人才管理協會,發布首份《粵港澳大灣區薪酬及福利調查》報告,每份只售港幣五千八百圓,網羅港、澳兩地十二個行業一百七十一個職位以及粵省十一個行業一百七十五個職位嘅薪酬福利。「我期望報告能夠為企業、政府部門提供可靠嘅薪酬資訊,吸引更多外商去大灣區投資投資,及促進年輕一代喺灣區內就業!」協會副會長黃諫珍如是說。

報告披露嘅大量「可靠嘅薪酬資訊」之中,各位同學最切身一項,莫過於「應屆畢業生入職薪金」。去年多名浸大生登入學校網站為家中供書教學多年嘅雙親預留畢業禮門票時察覺,校方不但強制佢哋先行填妥一份問及月薪、對學系歸屬感、對學校歸屬感嘅問卷,問卷更隱藏一頁標明「呢份並非不記名問卷/登記表格。你前進即係你同意向問卷/登記表格持有人披露你個 SSOid 、姓名、學系同電郵地址」,與電郵所謂「不記名」前言不對後語。一旦書友仔一片孝心自爆咗 how much one month 換兩張飛、一個屈尾十落咗 report 、轉身賣埋畀周綺萍,按圖索驥壓價,到時就真係東郭先生喇。

〈浸大畢業生調查二〇一八〉隱藏頁面,要喺網上問卷首頁撳「上一頁」斯睇到。

 

另一處就話「所有資料會嚴加保密,冇人身份會被曝光」……

呢頭 chok 完你搵幾錢個月,嗰頭又問你有幾同意「我對香港浸會大學有歸屬感」。

 

《大學》有云:「物有本末,事有始終,知所先後,則近道矣。」《論語》有云:「孝弟也者,其為仁之本與。」一家標榜「全人教育」嘅中國學府,趁莘莘學子忙於攙扶老父老母出席畢業大禮之際攔途截劫,索要薪酬資訊、「歸屬感」等買路錢,恐怕孔、孟以迄錢、唐、牟,始料未及。

人心不古。