上星期六,香港語言學學會友好假座香港城市大學簡介 2019 年第一期粵音朗讀測試。敝會特派記者謹到場記錄會上要點如下,以資今期考生並各位讀者參考。

考試流程

 

主辦方建議考生於開考前 15 分鐘抵達試場,以便監考員登記。考生屆時須出示: 

  • 一)身份證明文件,上附正面免冠照片
  • 二)准考證(紙本,或儲存至流動裝置上之電子版)

監考員將核實考生身份,並作指示;考生進入考場後,監考員將指示考生向錄音機朗讀測試內容,需時約十五分鐘。測試分為三部份:

  • 甲部)朗讀單字
  • 乙部)朗讀多音節詞
  • 丙部)朗讀篇章

甲部,朗讀單字( 20% )

考生須準確讀出四十個單字(從〈附件一:粵音朗讀測試字表〉抽出),限時兩分鐘。以通用讀音為準,例如「貓」字須讀做 maau1 ,異讀為 maau4 或 miu4 將失分。

乙部,朗讀多音節詞( 20% )

考生須準確讀出三十個多音節詞彙(從〈附件二:粵音朗讀測試多音節詞彙表〉抽出),限時兩分鐘。同上,以通用讀法為準,例如:

  • 「朱古力」讀 zyu1 gu1 lik1 而非 zyu1 gu2 lik6 。即使多音節詞彙中嘅單字有多種讀法,以最適切該詞彙意思嘅讀法為準
  • 「搭車」讀 daap3 ce1 而非 daap3 geoi1 、「車馬費」讀 geoi1 maa5 fai3 而非 ce1 maa5 fai3 。多音節詞彙中嘅單字有文讀、白讀之分,亦以最適切詞彙意思嘅讀法為準

丙部,朗讀篇章( 60% )

考生須朗讀兩份即場派發嘅篇章,篇幅均為二百五十字上下,一篇從〈附件三:粵音朗讀測試香港中文篇章列表〉抽出,為書面語;另一篇由〈附件四:粵音朗讀測試粵文篇章列表〉抽出,為口語。

獲發篇章後,考生共有四分鐘準備時間閱覽。閱畢,考生須準確、流暢而有節奏噉以純正香港粵語朗讀篇章。準備期間,篇章上每個單字均以粵拼(香港語言學學會粵語拼音方案)標注讀音,俾考生參考。準備時間過後監考員將為考生換上純漢字版本,考生要以正常語氣同語速讀出。

注意,朗讀書面語篇章時,慎勿自行翻譯成口語;朗讀口語篇章時,亦不必翻譯為書面語。例如「我們的」讀「我們的」即可,唔好讀「我哋嘅」;反之亦然。

《香港語文:聽陳蕾士嘅秘密》書影

總而言之,考試時間分佈如下:

  • 甲部:兩分鐘朗讀
  • 乙部:兩分鐘朗讀
  • 丙部:四分鐘準備,五分鐘朗讀(每篇兩分鐘準備、兩分半鐘朗讀)

共十三分鐘。

表現評核

 

評級分為 A 、 B 、 C 、 D 四等, A 最佳, D 最差。整體評級之下,甲部單字、乙部多音節字、丙部一書面語篇章、丙部二口語篇章,亦各有單項評級。

甲部與乙部只評核準確度,時限內準確讀出卷上所有字詞即可;否則,未讀出嘅字詞作錯誤論。

至於丙部,準確度外,亦講求流暢度口音純度方面;丙部評級將取決於考生最弱一環,因此主辦方建議慎勿顧此失彼,要兼顧各方面之表現。

是次粵音朗讀測試各部評分比程

考試規則(另見准考證背面):

 

  1. 考生必須於應試時間前至少十五分鐘到到達試場。
  2. 考生須攜帶並出示附有相片之身份證明文件應試。
  3. 考生若於測試時間15分鐘後仍未報到,須於同日補考;若補考空缺已滿,恕不另作安排。
  4. 考生進入測試室後嚴禁使用任何形式的輔助工具 (如筆記、字典、電腦及通訊設備)。
  5. 考生須保管個人財物,香港語言學學會對任何個人財物損失恕不負責。
  6. 考生若因任何原因未能出席考試,須於測試日期前兩星期內通知香港語言學學會,並提供相關證據(如醫生紙)。

常見問題

 

  1. 「如果發現自己讀錯咗,點算好?」

「如果考生喺甲、乙部份喺朗讀完一個字詞後發現自己讀錯咗,考生應立即更正最近讀過嘅字詞(以最後一次發音為準),但唔容許讀完下一個字詞後再回讀。

具體例子–考生陳悅音要由左至右朗讀以下單字:『腔』、『嘗』、『翼』、『檬』、『鯨』。佢喺讀完『嘗』字後發現『嘗』字發音唔準確,佢可以立即再讀『嘗』字;但如果佢讀到『翼』字先發現剛才『嘗』字發音唔啱,就冇得返返轉頭再讀返『嘗』字。

如果考生喺丙部份朗讀時發現自己有讀錯,可選擇盡快由讀錯嘅字開始重新回讀,唯篇章回讀會影響流暢度評分。」

  1. 「如果讀多咗字,會點算?」

「朗讀時讀多咗或者少咗字都會扣準確度分數。丙部篇章標題唔需要朗讀,但如果讀咗都唔會扣分,不過會佔用咗考生考試時間。」

  1. 「我唔識粵拼,點算?」

「粵音朗讀試嘅目的唔係考粵拼,所以唔識粵拼嘅朋友唔使擔心。不過香港語言學學會建議大家學吓粵拼。」

  1. 「朗讀篇章需要帶感情嗎?」

「朗讀試唔係要求考生表演朗誦,所以唔需要考生有特別嘅朗誦技巧。正常朗讀就得喇。」

 

詳見香港語言學學會粵音朗讀測試網頁

(「注意事項」、「評分準則」、〈附件一:粵音朗讀測試字表〉、〈附件二:粵音朗讀測試多音節詞彙表〉、〈附件三:粵音朗讀測試香港中文篇章列表〉及〈附件四:粵音朗讀測試粵文 篇章列表〉盡在頁底。港語學謹祝各位考生首戰告捷!)

                           

作者介紹

Leave a Reply

avatar
  訂閱  
提示