上莊係大學生活一件大事，同學往往都可以透過服務自學到啲知識；不過，浸大高層似乎就唔係咁諗。佢哋舊年推出政策：逼學生讀名為「CODE[1]」嘅領袖課程，以學會本有權利相脅。學會唔派代表出席CODE，將被禁於七、八月借用學校場地，以及參與賣物周活動等。今年又再「誠邀學會幹事」喇。

雖然政策上年已經同學鬧爆，校方依然冥頑不靈，繼續硬銷 CODE 課程。今次學生事務處「蘿蔔與棍棒」齊下，如果有超過三分一內閣成員出席，就會得到「獎勵」。但睇返，原來獎勵都係誠意欠奉：學生組織可以於60日前為其一項迎新活動*優先預留一個場地；或學生組織申請每個同學$20嘅迎新資助時，可獲加增至$26。有同學坦言，暑假如果唔做Part-Time去聽講座，真係人工都蝕埋。

另一邊廂，浸大嘅懲罰就嚴苛好多。學會唔派代表出席CODE，將被禁於七、八月借用學校場地，以及參與賣物周活動等。上年BU「蝗恩浩蕩」推出特赦措施：

「鑒於有一小撮學會向我哋就七、八月借用唔到場地向我哋求助，本處現提供以下補救措施：一、學會須提供悔過書（Confession）解釋為何唔去滿足要求；二、每缺席一個核心講座，學會須按Powerpoint撰寫不少於1,000字撮要交功課。」

到底呢個反智嘅CODE如何冒出，由何人制定，山神就想請各方指教；起碼我幾年前上莊，未遇過咁荒唐嘅惡策。不過，此事足證浸大自從以鐵腕手段打壓抗議普通話同學後，高壓政策經已得勢不饒人，繼續擴張。校內同學必定會負隅頑抗；而即將放榜，未入校門嘅莘莘學子，則君子不立危牆之下，自己睇路喇。

[1]全寫為「a series of workshops packaged as “Coaching, Organization Development, and Engagement (CODE)” Programme」