浸大普通話畢業門檻一向怨聲載道，近年回應浸大山神發起公投中有九成學生要求取消門檻，而「袋住先」式推出普通話豁免考試，俾學生唔使修讀學分課程，考試合格就畢業。不過，考試一直違反校方承諾，唔係測試學生「基本普通話溝通能力」，舊年就出過「向遊客介紹經西隧的巴士線」等荒誕題目。

今年普通話試再獻新猷。有同學喺HKBU Secrets爆料，指普通話考試其中一條必答題要求考生做「大灣區高校夏令營」嘅香港大學生代表，要致歡迎辭咁話。

題目屬口試嘅「高級題」，要求「考生根據題目所提供的信息，在限定的時間內作出得體的口頭回答」。同學反問：「呢個角色的學生代表一定要擁抱大灣區，唔擁抱唔愛國唔信大灣區嘅大學生，點會參與呢個夏令營？」更加質疑條題目限死考生「唔可以鬧大灣區唔可以唔信大灣區都唔可以質疑大灣區，因為咁就唔入戲，唔可以『置身於某一個特定場景、以某一個特定身份發言或發表見解。』。」

同學最後喺考試入面都冇跟隨「語境」吹奏大灣區，而考官竟然當場皺下眉頭。最後同學喺文章寄語：「答完已準備好用3cred 讀普通話。就算是考試都好，我唔認同大灣區就係唔認同大灣區，浸中無得逼同學。如果呢個真係其中一個手段，我以浸中為恥。」

因應每年浸大普通話考試出現極多異常問題，浸大山神而家做緊統計，希望收集近多類似情況，務求考試過程同埋同學嘅成績都會得到公正對待。歡迎浸大同學填寫以下表格報料。