浸大學生會呼籲星期三罷課、罷工、罷市

浸大學生會今日（十一日）發聲明呼籲全校師生喺六月十二日（星期三）罷課、罷工、罷市，以癱瘓社會運作向政府表達港人反送中嘅決心。「民意不可欺，望港府懸崖勒馬收回成命。」

聲明提及六月九日一百萬人上街遊行，反對修訂逃犯條例。但港府仍然出聲明挑釁同漠視民意，觸發部份示威者嘅情緒。同時間，面對警方強硬嘅清場手段，喺立法會靜坐嘅示威者終與警方爆發衝突。全副武裝嘅速龍小隊對上手無寸鐵嘅示威者，竟出動胡椒噴霧、警棍去驅趕和追打市民等等。學生會認為「當所有嘅和平手段都毫無作用，升級行動只是順應而生。」「十幾個同窗喺琴日嘅衝突中受傷，面臨被捕風險。由幾時開始，守護家園呢個咁卑微嘅願望成為咗一宗罪？如果港人因送中惡法而身陷囹圄，其罪名唔係非法集結、唔係暴動，而係面對不公選擇咗發聲。」

幹事會會為被捕同學提供一切支援，亦會繼續與香港人同行；並且呼籲全校師生罷課、罷工、罷市，望港府懸崖勒馬收回成命。