香港首富李嘉誠今日（16號）喺全港各大報章登報，全文僅24字，完全係用廣東話寫成：「正如我之前都講過：『黃台之瓜，何堪再摘』一個香港市民李嘉誠」。分析指，用廣東話寫文不但令香港人更有親切感，同時係指明廣告對象係港人而非北京。

「黃台之瓜，何堪再摘」出自受政治逼害嘅李賢，臨死前對當權者武則天作出死諫詩。李嘉誠首次喺2016年3月長和業績會提出，當時啱啱發生「魚蛋革命」。李嘉誠仲話，唔同政見嘅香港人都唔應傷害香港，不應對自己嘅「仔女」趕盡殺絕。

李嘉誠父親李雲經常告誡李嘉誠，要喺香港生存，「就要學做香港人」：佢下令李嘉誠改掉潮汕口音，學好廣東話，而李嘉誠廣東話老師正係其表妹兼髮妻莊月明，自此佢喺任何公開場合都係用純正廣東話講嘢。近年李嘉誠接受外媒訪問時，即使記者以英文問問題，仍然堅持用返廣東話回答。記者譽為「簡直是港語學最佳示範！」