2016年浸大宿舍食堂由美心集團經營，其時浸大山神不斷報道多單蟲害問題，最後終於爭取2017年6月結業。浸大山神喺當中力主驅走美心經營嘅浸大食坊（Hall /蟲can）。「美心無論喺衛生、食物質素定服務態度上都極其惡劣！」浸大山神陳樂行就話，經過極力爭取先得以成功光復Hall can。佢希望分享趕走美心嘅經驗，可以幫到其他院校受劣食困擾嘅同學。

喺浸大山神成立之初，不斷都收到同學投訴Hall Can食物質素差劣，甚至不斷出現蟲蹤，因此山神喺16年暑假開始倡議踢走美心，趁續約大限將至引入其他較可靠嘅食肆。開學後陳樂行更開始收集美心有蟲嘅證據，依照法例向食環署投訴。「投訴其實唔難，填返1823個表就得，最緊要有相。當時餐廳衛生實在太惡劣，食環去幾次就有所斬獲。」

借顯微鏡驗出蟲肢 食環巡查封餐廳清潔

浸大山神喺9月初接到同學投訴，指喺美心賣出嘅米粉有蟲。陳樂行當時特意借來顯微鏡檢驗，發覺真係有問題，就循各方渠道投訴浸大食坊。當時校方向美心發出書面警告，要求於10日內提交報告並防範同類事情再發生，亦根據合約罰款1000元。當時調查指米粉用紙包裝，空隙令昆蟲污染食材。

罰款不足兩個星期，Hallcan外賣又再出現蟲蹤；反映校方罰款僅千元嘅政策對於美心大集團欠缺阻嚇力，根本需要重新招標，踢走美心方可解決問題。

學生代表竟放棄再招標 山神狙擊下會議重審

2016年11月15日，原以為佔近八成學生代表嘅膳食附屬委員會將決定踢走美心，重新招標，但爆出用不記名投票下通過續約，將會簽23個月合約續到2019年。陳樂行對結果都甚為驚訝，但睇清制度後發現學生代表審議確有問題，於是喺民主牆上展開狙擊行動，張貼咗當時甚具爭議嘅海報：

 

蔡、宋、周堂急急回應指，同美心續約理由有二：只係續約兩年，招標好大機會失敗；加強罰則，限制加價幅度，就可以控制膳食質素。山神再度撰文《人蟲不兩立》，批評宿生會續約係「冇骨氣」，呼籲佢哋「承認建議同Hall Can續約係錯誤決定，為宿生與同學福祉，爭取重新招標」。終於喺2016年11月22日，即係學生會「食蟲行動」前一日，膳委會宣佈撤回Hall Can續約決定，最終審議下重新招標，喺2017年6月踢走美心，由金枕頭泰國餐廳獲選接手。