今日（14號）起浸大校長錢大康開始首場「與管理層心靈對話會」，但係場面十分冷清。喺兩名副校陪同下，只有總共4名同學出席。被問到如何回應有警察到校內追捕學生，錢大康指保安依照法例唔會阻止警察追捕，只會阻止警察喺無搜查令下走入校園調查案件。佢話近日會增加保安人手，除咗要保障學生安全，更加要防止有人喺教學樓擲物至鄰近嘅解放軍軍營。
錢大康話，有唔少大陸學生同佢反映，擔心喺校園嘅人身安全，因為多咗好多著黑衫嘅人出入，希望增加保安人手。佢強調，如果保安唔會針對著唔同顏色衫嘅同學聚集，增加人手只係希望了解校園各處集會情況，令學生放心。佢提到，尤其擔心有人會喺浸大教學及行政大樓投擲物件到軍營，為大學帶來麻煩。
浸大各處保安人手明顯增多，喺每20米都見到有一個保安。
最後管理層囑咐在場嘅大陸學生，可以邀請多啲大陸學生到每一場對話會，等對話有多啲唔同聲音，俾唔同群體嘅同學聆聽立場。
| 延伸閱讀： |
|---|
山神Telegram Channel：https://t.me/hillgod