邵家臻突然被停教學 浸大將調查及紀律聆訊 追究佔中案

浸大講師邵家臻今日(17號)下午被浸大召見,獲浸大告知決定即時暫停邵家臻教學工作,並且會成立外部調查委員會及進行紀律聆訊,而邵家臻社工系講師身分會暫時保留。邵表示明顯係浸大正進行政治清洗。

邵家臻喺舊年4月9日佔中案被判有罪,判囚八個月,期後喺十月獲釋,繼續教學工作。邵家臻指本來獲發工作時間表,但網上就未有相關資料,因此向管理層查詢,直至今日方知為被停教職。邵家臻表示,「浸大明顯係要趕盡殺絕,對其除之而後快,目的就係政治清洗。」

邵家臻又指,佢同港大法律系副教授戴耀廷已經入稟上訴,案件將會喺2月尾審訊。佢質疑既然仍未有上訴結果,浸大草率作停職,有違程序公義。。

浸大學生陳樂行指,浸大處理邵家臻嘅程序完全破壞先前校方對師生承諾嘅「程序公義」:「浸大處分師生嘅權力源自《香港浸會大學條例》,因此要紀律程序要服從程序公義。之前佛光街案同打人嘅大陸學生未有受紀律處分,就係因為案件已經進入司法程序,大學聲稱唔應該喺司法程序完結前插手處理。同理,喺上訴未有結果之前,浸大就開展對邵家臻嘅紀律聆訊,係完全違反程序,無權執行。」

邵家臻將會同教職員工會商討進一步行動回應浸大無理停職及政治打壓。