七大校長跟機捐人工 錢大康捐款比例最低

繼城大高層前日(17號)宣布今年每月捐人工後,其餘七間大學高層尋日(18號)都一齊宣佈會捐人工以幫助校內需要經濟支援嘅學生。浸大山神統計各大捐人工比例,發現喺七大中,浸大捐款比例為全港最低,亦唔似得其他大學咁全數支援貧苦學生。

香港浸會大學表示,校長錢大康決定捐出一個月薪酬,而大學高級管理層其他成員亦作出捐款,為有需要學生提供緊急支援。浸大表示,捐款亦會用於支援前線醫護人員,以表示對他們嘅一份心意。不過,浸大未有透露其他成員係咪好似其他大學咁捐出同樣比例嘅人工,亦冇講捐款有幾多用喺學生,幾多用喺醫護。

香港大學宣布成立「抗疫援助基金」,協助有需要嘅學生及社會人士,初步目標籌集一千萬元。港大校長張翔與全部五位副校長,將帶頭捐助百分之十嘅薪金,為期一年,並鼓勵港大教職員同其他成員參與支持。

香港理工大學昨亦宣布,校長及所有副校長今年四月起每月捐出一成薪酬,為期一年,幫助校內面對經濟困難嘅學生。理大校長滕錦光表示,疫情對本地各行各業帶來嚴重影響,校方尤其關注部分學生家庭及個人嘅經濟困難,希望透過補助金給予支援。

嶺南大學昨日向教職員及學生發出內部電郵,公布校長鄭國漢同副校長莫家豪決定捐出一年薪金嘅十分之一。鄭國漢表示,十分關注應屆畢業生嘅就業前景,希望捐款協助他們,包括支持創業和其他社會服務計畫。

香港教育大學昨亦宣布,校長張仁良聯同三位副校長,捐出未來十二個月薪酬嘅百分之十,予教大作助學金之用,支援有經濟需要嘅學生。張仁良表示,為紓緩同學可能面對嘅經濟壓力,是次捐款將投放在大學嘅助學金上,讓更多學生可得到支援。教大早前亦發起募捐活動,捐贈口罩予大學前線員工嘅家人,包括清潔工、保安員、搬運工人、校巴司機、飯堂員工及園藝工人。

香港公開大學宣布,校長黃玉山聯同學術副校長關清平、副校長(資源及發展)呂汝漢同副校長(學生及支援)唐創時,將捐出每月一成薪酬,為期一年,支援學生在生活及學習上所需。黃玉山表示,大學一直關注疫情對學生嘅影響,為咗與學生共渡時艱決定捐出部分薪酬 。

科技大學校長史維亦會捐出一個月薪酬,支援有財政困難嘅學生;亦都宣布容許他們延遲繳付學費,亦透過經常性開支下嘅各項資助與助學金計畫,以及校友基金等提供支援。科大稱近日亦增設咗一個專項基金,進一步加強對受疫情影響學生嘅資助,校長史維已向基金捐出四月份工資,呼籲科大包括教職員同校友等成員加入,提供支持及捐助。

城大校長郭位前日已公布,聯同所有副校長合共八人捐出今年五月至十二月嘅一成薪酬予城大及社會人士,共渡時艱。

 

想知道更多有關港語學嘅資訊?請立即訂閱港語學telegram channel同Instagram,跟貼廣東話最新消息!

Telegram:https://t.me/gongjyuhok

Instagram:https://instagram.com/gongjyuhok/