DJ麻利冀新一代歌手改善咬字 姜濤感謝批評 承諾改進

商業電台叱咤903 DJ麻利前日喺IG分享討論正音嘅文章,希望新一代歌手開始重視咬字,並且警告令下一代懶音問題更嚴重;由於文章批評新一代歌手,引起一眾支持者不滿,其中姜濤嘅一名擁躉就鬧麻利:「唔該唔好再單打佢,濤濤只係一個小朋友!」直至今日凌晨姜濤回應:「感謝所有批評我的人,是你們讓我更加了解自己的不足,我會努力改進的。」

當時麻利IG內容主要批評新一代歌手咬字唔正,認為新歌手應該好好改正咬字,否則聽廣東話歌成長嘅下一代懶音問題只會更加嚴重。佢又慨嘆一代不如一代,新一代歌手不如許冠傑、張學友、張國榮等咬字清晰。

不過分享後,卻惹來一眾姜濤支持者不滿,紛紛inbox理論,其中一名「姜糖」更鬧爆:「佢唔需要唱歌咬字正都可以好紅!唔該唔好再單打佢,濤濤只係一個小朋友!」

麻利喺IG逐一反駁「姜糖」嘅言論

麻利隨即表明自己並非針對個人,又指Fans對號入座:「我冇開名就係因為我唔係講佢,亦唔單止只會講佢,開名就話我點名批評人,唔開名就話我媽咪姐?會唔會係你哋自己都知道自己偶像有懶音,全部走嚟對號入座,然後我係一個講出呢個現象嘅人,就係我唔啱?」

姜濤今日凌晨在ig限時動態回應:「我不會給自己找任何的理由和藉口,謝謝你們給的意見,也很感謝所有批評我的人,是你們讓我更加了解自己的不足,我會努力改進的。」

 

想知道更多有關港語學嘅資訊?請立即訂閱港語學telegram channel同Instagram,跟貼廣東話最新消息!

Telegram:https://t.me/gongjyuhok

Instagram:https://instagram.com/gongjyuhok/