「李医生」抖音拍片稱「講粵語易得鼻咽癌」捱轟 專家:誤導民眾


近日有自稱「李医生」嘅大陸抖音帳號拍片,聲稱「講粵語容易得鼻咽癌」,喺大陸網絡被熱議。鼻咽癌專家指,有關講法歸因有誤,誤導民眾。

片段可見「李医生」身穿「廣州中醫藥大學第一附屬醫院」白袍配搭Polo衫,設問「講粵語的人容易得鼻咽癌嗎?」並自答:「答案是YES!有一定的道理。」「李医生」指講粵語人鼻咽癌比例比講普通話、客家話、潮汕話多,並稱可能同粵語有頂鼻音(-ng)有關。

身兼港語學召集人同中醫實習生嘅陳樂行,直指有關講法荒唐:「條友完全係唔識嘅。」佢指鼻咽癌好明顯係同基因、飲食有關,而且條片講到廣東話獨有嘅「ng」音,其實普通話等等嘅語言都有,「根本係亂噏廿四」。佢批評抖音充斥同類低質嘅內容同謠言,呼籲市民切勿使用,以免對腦部造成損害。

據了解,片中人為廣州中醫藥大學第一附屬醫院李佳殷醫師;即使有片為證,但自從條片引起公憤後,佢就極力否認有講過有關言論。雖然醫療上失德,但似乎佢本人並未有遭到大陸有關醫療機構嘅追究。

今次唔係第一次有人中傷廣東話。《海南醫學》雜誌○四年曾刊登題為《鼻咽癌語音易患因素與難患因素分析》文章,研究推測粵語發音係誘發鼻咽癌嘅原因之一。

中山大學腫瘤防治中心副院長、鼻咽癌專家錢朝南,直斥該研究犯了常識性錯誤,將「說粵語嘅人鼻咽癌發病率高」嘅相關性現象,當成「說粵語更易患鼻咽癌」嘅因果聯繫,很容易誤導民眾。

及後文章作者承認研究不成熟中山大學中文系教授余偉文亦笑言,從未聽過粵語發音易致鼻咽癌,並指中國很多方言都有很多鼻音,如潮州話等,佢認為疾病應與基因、氣候、土壤、習俗有關,與說話有關嘅可能性不大。

廣州市第十二人民醫院副院長于峰,係該研究文章係作者之一。佢受訪時承認有關研究並不成熟,要確定粵語與鼻咽癌發病係咪有關,需與通過長期及大規模的對照研究找出依據。

延伸閱讀:

抖音封禁廣東話片 「整改建议:请尽量使用普通话」

想知道更多有關港語學嘅資訊?請立即訂閱港語學telegram channel同Instagram,跟貼廣東話最新消息!

Telegram:https://t.me/gongjyuhok

Instagram:https://instagram.com/gongjyuhok/