今日(14號)中西區區議會喺財務委員會表決通過由港語學申請$20,000嘅「中西區故事廣東話徵文計劃」,意味首次有公帑支持廣東話嘅文學計劃,並且用地區為主題徵集文章。

港語學主席陳樂行代表出席會議,佢表示希望透過徵文比賽培養中西區嘅鄉土情懷同人文精神,並且印製1,000本文集送畀中西區中學同社區。佢希望,透過社區人嘅母語記錄中西區嘅故事點滴,從而建立同埋重振香港人嘅文化精神。

有區議員對表示讚賞,認為喺政府大推「普教中」(以普通話教中文科)、唔平等嘅情況下更加應該要搞活動發揚粵語文化;亦有區議員擔心學生對廣東話文學比較陌生,活動比較單調。陳樂行指,由於今次係首次申請,根據區議會條例預算只能以$20,000為上限,希望下次申請可以增加工作坊、講座等,培養新一代廣東話嘅文學人才。

根據港語學提交嘅計劃書,徵稿期將會係5月至9月30號,11月會公布賽果。陳樂行話,佢亦都正喺其他區議會申請類似嘅徵文計劃;如果想跟進最新消息,可以留意「港語學廣東話徵文比賽」Facebook專頁。

港語學廣東話徵文比賽

https://www.facebook.com/cantoncompo/

 

想知道更多有關港語學嘅資訊?請立即訂閱港語學telegram channel同Instagram,跟貼廣東話最新消息!

Telegram:https://t.me/gongjyuhok

Instagram:https://instagram.com/gongjyuhok/

港語學

                           

作者介紹

Leave a Reply

avatar

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料

  訂閱  
提示