但錢大康事前已經放晒風，堅決死攬普通話政策，於是我作為公投發起人，喺論壇上憤而質問：「錢大康話：『睇唔到浸大有取消普通話政策嘅任何可能。』咁仲有咩討論空間？咁唔通我哋學生通過公投、教務議會表決咗之後，都唔可以取消強制普通話政策咩？咁樣好霸道啫。」

蘇博士個回答好平淡，但對我嚟講非常震撼。佢話：「我唔知道錢大康講過啲咩，亦都唔評論啦——但校長唔係大晒，佢都只係聽教務議會嘅表決做嘢。只要教務議會議決通過，普通話政策就可以取消。」

聽到佢講得咁堅定，我都好驚訝。我好少內心咁受觸動，冇再進一步追問問題。我第一次感覺到，浸大管理層都有講道理嘅人，唔係個個都咁獨裁。於是我喺論壇之後繼續做文宣，通過咗學生公投；又搵晒論文證據，包括本地語言政策研究同新加坡嘅學術數據，證明「普通話畢業門檻弊多於利」，希望遊說各學院嘅院長同高層，喺教務議會投下「廢普」嘅贊成票。

但翌年，蘇博士就做咗考評局秘書長，離開浸大。錢大康更加專橫，屢勸不改，最後喺學生和平到語文中心抗議後，破天荒將連我同劉子頎停學，為浸大嘅校園暴政揭開新嘅一頁。

停學兩年，我有陣時都會諗起蘇博士，諗起佢嗰句「校長唔係大晒」。今時今日面對千夫所指，蘇國生仲提緊「審題委員會」及「科目委員會」，就好似佢當年咁重申制度上要以教務議會為依歸咁。但而家佢坐得呢個位，仲有可能講句「爱国唔係大晒」咩？何況今日唔係2016年嘅嗰個四月，嗰個梁天琦參選完補選無耐嘅四月。

執筆之際，教育局長楊潤雄竟然無視所有機制，揚言話會要求取消成條爭議試題；又會派員到考評局了解出題機制。我希望蘇博士頂住，因為我睇住教育界會講道理嘅人越來越少。我仲係好奢望呢個社會，唔好再輾碎一個又一個真正講道理、講規矩、講制度嘅人；又寄望喺巨輪之下，我哋都仍然做粒堅定不移嘅頑石。