香港第一本全廣東話嘅文學期刊正式推出啦！香港好多嘅文學作品都係得書面語，而呢本文學期刊用嘅係真正代表香港人嘅語言──粵文。

相信大家都睇過網上作家寫嘅故仔，一開始用廣東話寫，出咗名之後又會俾書面語嘅版本取替，但其實對香港人嚟講，廣東話一睇就明，最有親切感。點解廣東話嘅作品一直都無得發展落去呢？同樣用繁體字嘅台灣，人口高過香港三倍，用普通話、國語寫成嘅書面語就變成咗主流，用廣東話寫得再好嘅作品都係要符合返佢地嘅市場，最終香港嘅文學作品咪得返純書面語囉。

呢本文學期刊集合咗唔同嘅網上廣東話作家，一齊嘗試用唔同嘅文體，寫一啲高質嘅小說散文出嚟，會唔會有一日會喺香港教科書上見到呢啲粵語文學作品呢？希望有意捍衛香港本土文化、又熱愛廣東話嘅香港人會支持呢本全廣東話嘅文學期刊啦！

 

想知道更多有關港語學嘅資訊？請立即訂閱港語學telegram channel同Instagram，跟貼廣東話最新消息！

Telegram：https://t.me/gongjyuhok

Instagram：https://instagram.com/gongjyuhok/