日本youtuber秋山燿平:「廣東話的確係好有魅力嘅語言!」

日本youtuber秋山燿平認為廣東話除咗歷史悠久、能夠保留古代中文嘅特色之外,仲能夠同更多嘅人「真正地溝通」,對華人社會文化有更深入嘅了解。但係秋山燿平同我哋香港人都心同感受,亦抱有同一個疑惑──既然廣東話咁有魅力,點解咁少人學呢?

秋山燿平就以日本人的角度提出咗最大嘅原因:原來最令外國人卻步嘅原因就係一個字「難」,而呢種第一印象源自於用廣東話做母語嘅人成日都話「廣東話好難學㗎!俾心機學普通話仲好啦!」呢啲「趕客」嘅口吻就令到好多外國人失去學廣東話嘅動力。

的確,相比於九個聲調嘅廣東話,得四個聲調嘅普通話更易上手,但其實有好多外國人都希望透過學習廣東話更了解香港文化,而唔係純粹想簡單咁學語言㗎咋!秋山燿平又鼓勵用廣東話母語嘅朋友仔多啲宣揚廣東話嘅優點,而唔係成日話「難」,令到外國人失去咗對學習廣東話嘅興趣。

相信香港人都唔想見到屬於我哋本土文化嘅廣東話喺不久嘅將來被普通話全面取替,成為瀕危語言,甚至被滅絕㗎嘛?既然連日本人都會欣賞廣東話,作為香港人嘅我哋係咪應該更努力守護屬於我哋嘅語言,將呢種咁有魅力嘅語言發揚光大呢?

參考資料:秋山燿平youtube Channel