本身係勞工界議員嘅何啟明，噚日轉任為勞工及福利局副局長第一日返工，而立法會大樓亦隨即移除佢嘅水牌。何啟明上任問責官員第一個記者會。佢嘅講英文成為焦點，或者何啟明都知道自己英語能力有幾斤幾両，帶備貓紙會見傳媒應付英語提問，而老細羅致光亦幫手答問題，相信羅致光揀何啟明個陣都非常清楚佢嘅英文能力，而且何啟明仲要係羅致光嘅首選添。

何啟明講英文成為焦點，但佢答英文提問時答得好短大概40秒，其實三月個陣仲係議員個陣，面對記者已經比人笑過一次英文能力同學歷唔對稱。喺問答環節中，有記者指坊間有人質疑何啟明嘅能力，包括英語能力。何啟明回應話市民自有公論，而當記者提出英文問到佢同新任財經事務及庫務局政治助理、民建聯葉俊廉皆為建制政黨成員，是咪同外界所指今次任命有政治成份；點令公眾相信自己足以勝任副局長工作；過往佢擔任工聯會立法會議員期間多次質詢羅致光，如何看待和現任上司的關係；失業率創新高之下，政府又會否考慮推出第3輪防疫抗疫基金。

何啟明第一句回應竟然係話「呢位記者提出好多問題」，之後拎出早已放喺袋嘅貓紙，開始照稿讀。但唔知何啟明係咪太過緊張，定係英文水平有限，過程中難免有啲甩咳。羅致光可能睇到呢個情況怕何啟明搞唔掂，即刻幫手並用英文講「我回答第3條問題」，而何啟明得到老細解圍後亦都明顯放心咗。何啟明講英文回管嘅內容都係話會盡力（try my best）向局長學習做好政策 ( make good policy ）， 但政府出嘅英文transcript就變為「make good policies」。

何啟明經常要求政府設立緊急失業援助金，但羅致光一直企得好硬拒絕，依家何啟明作為副局長仲會唔會繼續爭取，何啟明就回應話唔同崗位有唔同角度，會積極學習，亦會同政府繼續商討設立失業援助金。何啟明講得咁婉轉，希望佢依然會保持「初心」啦。有民主派議員就發現羅致光喺影相期間搭住何啟明個膊頭，喺社交平台形容何啟明為「似畢業生上台致詞多過似一個副局長」，仲笑何啟明姿勢係無自信嘅身體語言。

另外有網民指出何啟明出任問責官員之前曾向黨友諮詢意見，質疑上周五仲係議員身份嘅何啟明，出席財務委員會並喺54億港元海洋公園救亡撥款中投贊成票，己經確定自己將獲委任為副局長，有利益衝突之嫌，何副局長除咗要努力學習英文，更加有需要盡快向公眾同執法機構交代。

參考資料：https://hk.appledaily.com/local/20200601/SVOOU67ILGGOH76QN53AJYNJWM/