廣東話入面,好多中文字嘅讀音都好相似,但意思就唔同,一旦搞錯咗就會令人得啖笑。就好似發展局副局長廖振新咁,噚日就喺立法會上面,將「風水」聽咗做「供水」,搞到俾議員鬧爆唔識中國概念,仲要不停咁道歉添。

話說屯門龍鼓灘有唔少厭惡性設施同埋重工業,當中仲有靈灰安置所,導致當地嘅空氣污染同噪音污染特別嚴重。有見及此,有議員就喺立法會上面就環境問題提出質詢。當中地產及建造界議員石禮謙就追問,當局有無同當地居民研究風水問題。

廖振新最初回應嘅時候就完全避開風水問題,淨喺講關於龍鼓灘填海計劃嘅事,當時石禮謙已經有少少火滾,多次追問風水問題,希望當局回應。而立法會主席梁君彥都多次重複「風水問題」,怕廖振新聽唔到咁。但廖振新就九唔搭八咁,不斷自言自語咁講「供水問題」,然後就話喺規劃嘅時候會做技術評估,其中一個要求就喺供水,仲話如果有個別村民有供水個案,都希望石禮謙可以提出,當局就會同水務署商討。

「風水」變「供水」,石禮謙當然唔接受廖振新嘅答案,隨即話「係風同埋水呀,風水係中國概念嘅環境呀。」廖振新聽到之後即刻道歉,又話自己聽唔清楚,之後又話會再同村民研究。隨後喺會議廳外,石禮謙就話廖振新中文都唔識聽,睇怕要講英文先得。廖隨後步出會議廳時亦即刻搵石禮謙講番唔好意思同埋握手,仲解釋話因為有雜音聽唔清楚。

---------------

想知道更多有關港語學嘅資訊?請立即訂閱港語學telegram channel同Instagram,跟貼廣東話最新消息!

Telegram:https://t.me/gongjyuhok

Instagram:https://instagram.com/gongjyuhok/

Twitter:https://t.co/gongjyuhok

 

                           

作者介紹

Leave a Reply

avatar

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料

  訂閱  
提示