中國國安法 提倡母語教育受訪都要罰 藏人扎西文色遭重判五年

藏人扎西文色(Tashi Wangchuk)因為接受《紐約時報》採訪嗰陣提倡藏語教育,早前被判煽動分裂國家罪成,判處有期徒刑5年。其判決書喺今日曝光,指佢受訪所提及嘅內容係顛倒黑白,污蔑攻擊政府。而判決書亦提及影片經已被大量轉載,損害咗國家形象。

網上流傳嘅五頁判決書指,檢察院指控扎西文色喺2015年7至12月期間,接受《紐約時報》拍攝「一個藏人的追求正義之路」嘅短片,佢以被採訪者嘅角色,「顛倒黑白、污蔑攻擊我國政府『消滅民族文化』,歪曲近年來藏區發生的自焚事件性質」。佢又被指惡意曲解國家對少數民族嘅政策,蓄意煽動民族仇恨、破壞民族團結等。

判決書亦提及,雖然被告話無故意煽動分裂國家,不過經查後認為佢係「具有完全刑事責任能力」,認為其犯罪主觀故意明顯,辯解及辯護嘅意見都不能成立。法院認為,扎西文色受訪及發表破壞民族團結及國家統一嘅言論,「視頻上傳後,引起了多家網站、論壇、博客、及社會平台大量轉載、評論、報道,給國家形象及藏區社會穩定造成負面影響」。扎西文色因接受《紐約時報》採訪、提倡藏語教育,被控煽動分裂國家罪,囚禁兩年後案件喺今年初,青海玉樹州中級法院審理,直到上星期被判處有期徒刑5年。

該題為《一個藏人追求正義之旅》(A Tibetan’s Journey for Justice)嘅紀錄片由《紐約時報》製作,講述扎西前往北京嘅旅程,其佢呢一趟係想尋求法律援助,為學校中缺乏藏語教育而對地方官員提起訴訟,卻反過來被扣上「煽動分裂國家」等罪名,然而呢一項罪行明顯無確實嘅範圍,詮釋權完全擺喺權力者手中,亦即係被懷疑「有意圖煽動、顛瘋國家政權」就可以入罪。

國際特赦組織東亞區研究主任羅助華(Joshua Rosenzweig)早前就話,「對扎西文色的判決存在嚴重不公。佢以和平的方式讓大家關注藏族文化被侵蝕嘅問題,如今卻受到當局嚴厲懲罰。中國政府將提倡藏語教育而和平發起嘅行動說成係’煽動分裂國家’,根本係荒謬絕倫嘅講法。」

資料來源:https://cn.nytimes.com/china/20180523/tibetan-activist-tashi-wangchuk-sentenced/zh-hant/