濃烈廣州腔 聽到好出神

20年06月18號 ✍ 💡 文集

北京硬推「港版國安法」,最近更加放風表示,中央有權直接對部分「特殊」國安案件進行調查;同時,內地官媒故技重施,以「我愛嘅香港,我想你返嚟」做主題,由《人民日報》用溫柔嘅手段製作短片,企圖打動香港民心。有學者同時事評論員就話,剩段片矯揉做作兼濫情,似係一條「軟皮鞭」,相信大部分香港人都「唔啱食,哽唔落」!

段片大概253秒,字幕都係繁體字,全廣東話旁白,帶有濃烈嘅廣州腔,而且畫面都係日常嘅香港街景,亦都融入香港人日常生活同工作嘅零碎片段,亦有部分係反送中運動嘅場面。短片一開頭,就已經點明主題:「我愛嘅香港,我想你返嚟!」隨後短片入面,就不斷叫春。

旁白情深款款咁話:「喺呢座城市行,穿過每條街道,見到一座座嘅房屋,我都會努力咁返轉頭諗:呢個係我土生土長嘅香港,曾經係點樣嘅?擺檔嘅阿婆點解唔再做我鍾意食嘅早餐?開貨車嘅大哥,點解唔再發出爽朗嘅笑聲?樓下嘅小妹妹,點解唔再開開心心喺度玩?」雖然話係廣東話,但香港人聽落去總係覺得唔鹹唔淡。之後更加用反送中期間,示威者縱火嘅畫面,反問道:「我愛嘅香港,你喺邊度啊?」

到最後先係「戲肉」:「我愛嘅香港,我想你返嚟」,仲話要「築起抵禦黑暴嘅籬笆」,痛斥「港獨」、「黑暴」勢力策劃「三罷」,試圖繼續破壞呢個安寧又美好嘅屋企。

剩段片就好似抗爭者嘅「軟皮鞭」,但個種「唔鹹唔淡」嘅廣東話,似乎唔係出自香港人口中。睇嚟,要學好一種語言,唔單止係長年累月嘅浸淫,更加係出自於對地方嘅歸屬感。

---------------

想知道更多有關港語學嘅資訊?請立即訂閱港語學telegram channel同Instagram,跟貼廣東話最新消息!

Telegram:https://t.me/gongjyuhok

Instagram:https://instagram.com/gongjyuhok/

Twitter:https://t.co/gongjyuhok

                           

作者介紹

Leave a Reply

avatar

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料

  訂閱  
提示