九成教師對教育未來失信心 「最後所有老師可能都要埋沒良心」

反修例運動令校園捲進政治風眼,教師嘅言行備受關注。學校同教師都受到唔同程度嘅衝擊。教協今日(16日)公布「當前社會環境下教師面對的政治壓力」調查方向包括教育工作者嘅個人層面、教學層面及其壓力來源。當中高達九成嘅教師認為當局對教育範疇嘅處理方法,令佢地對教育專業自主失去信心,甚至產生負面或極負面的影響。

近月不少政治人物及官員都發表咗針對教師同埋教育界嘅言論(例如林鄭月娥嘅「無掩雞籠」論)。有社會人士聲言要有系統咁檢舉教師嘅「問題」,有教師因為網上社交平台、喺上課嗰陣講嘅或者寫喺教材、試卷上面嘅片言隻語,甚至只係一張相,都會遭到投訴,被指「專業失德」。

而投訴又可能獲得教育當局或辦學團體嘅處理,教育局更表示情節嚴重者會考慮取消教師註冊資格,最近更要求老師喺求職嗰陣披露被調查情況。中央機構及媒體亦屢次攻擊香港教育界,措辭越嚟越強硬,將社會亂象之源歸因於教育,要對教育界進行清洗。

喺個人層面,有八成嘅教師擔心被家長及社會人士作政治投訴,或因個人立場被網上起底,另外亦逾七成教師因政府及其他社會人士嘅壓力而感到情緒困擾。

而喺教學層面,超過八成嘅教育工作者表示會喺授課中特意避開敏感議題,甚至有三分一嘅教師表示曾被上司要求避免教授與政治相關嘅課題,反映在目前的社會環境下,教學已直接受到影響。然而,政治相關嘅議題,唔單止係學校正規課程嘅一部分(如歷史、中國歷史、通識等科目),亦都係學校公民教育不可或缺嘅一環。調查結果又顯示,超過九成受訪教師並唔同意「學校應禁止學生討論政治敏感議題」。

逾九成教師認為「教育局/政府」、「建制派人士/團體」及「內地官方機構及媒體」有向教育界施加政治壓力,係佢地嘅壓力來源。有教師喺書面報告中講到「有啲人成日話教育歸教育,政治歸政治,唔應該俾政治進入校園。其實,最支持最大力推動政治進入校園,就是呢班人。佢地嘅目的就係要教育為政治服務,唔使提出問題,唔使有討論,淨係需要道官方認可嘅「事實」。求知、發問、自由嘅學術討論空間,喺佢地眼中,通通都係無價值,無意義。」

問卷調查嘅結果展示近月政治環境急劇惡化,而呢個調查無涵蓋最新嘅發展,例如教育局嘅最新舉措,以及國安法落實後嘅情況等,但調查結果已清楚呈現了教師嘅不安,以及對當局處理手法嘅不滿。最後,教協呼籲公眾關注教育界受到嘅打壓,共同捍衛教育嘅尊嚴、捍衛香港嘅核心價值,期望教育當局能夠停止傷害教育界,早日回歸其應有嘅本位。

參考資料:https://www.hkptu.org/71805#more-71805