喺國安法規定下，學校同圖書館都要進行審查，移除一啲涉及危害國家安全嘅書籍。美國國務卿蓬佩奧星期一就對呢件事作出回應，佢認為近期香港「圖書館戰爭」反映咗北京喺香港實行「奧維爾式」審查（‘Orwellian’ censorship）。

自從《國家安全法》生效後，康文署先係要求旗下咁多間嘅公共圖書館「覆檢」書籍，有關書籍若然涉及危害國家安全，就必須下架。結果，陳雲嘅《香港城邦論》、黃之鋒嘅《我不是英雄》同陳淑莊嘅《邊走邊吃邊抗爭》等9本書先後下架。此後，「圖書館戰爭」嘅煙火更加蔓延到中小學。星期日，教育局明言，學校提供畀學生嘅閱讀材料，唔應該涉及任何國家安全行為。

蓬佩奧喺星期一就對此發表聲明，佢譴責中共咁樣係破壞自由香港嘅持續行動。佢形容《國家安全法》「墨跡未乾」，地方政府就已經開始喺圖書館書架移除批評共產黨嘅書，禁止政治口號，甚至要求學校加強審查，呢種侵犯香港人權利同自由嘅行為同「奧維爾式」審查無異。佢又強調，香港之所以有蓬勃嘅發展，係因為佢允許民眾喺獨立嘅法治下進行自由思考同言論自由。

 

－－－－－－－－－－－－－－－

想知道更多有關港語學嘅資訊？請立即訂閱港語學telegram channel同Instagram，跟貼廣東話最新消息！

Telegram：https://t.me/gongjyuhok

Instagram：https://instagram.com/gongjyuhok/

Twitter:https://twitter.com/gongjyuhok