圖書館權蓋天 違國安法即禁書

《港區國安法》實施後,康文署轄下公共圖書館早前覆檢部分涉及本土政論嘅書籍,暫時不予外借或預約。公共圖書館諮詢委員會成員崔日雄琴日出席電台節目嗰陣就話,佢個人認為討論香港獨立嘅書籍可以擺放,但煽動犯法嘅書籍就唔可以。崔更表明,一旦館方界定書籍係違反港區國安法,即可列為「禁書」,換言之,公共圖書館係有「國安法」嘅詮釋權,甚至有權力過大之嫌。

 

佢又認為,公共圖書館應確保藏書唔會引導市民犯法或存在違法內容,同時確保容納到多元意見,指「討論係要有理有據」。議員陳淑莊撰寫嘅其中一本書正接受館方覆檢,佢喺電台表示,其書籍只提及六四事件以及個人經歷等,批評館方嘅覆檢行為毫無準則同客觀標準。

 

而有行政會議成員喺電台節目指出,康文署覆檢圖書館書籍內容,屬政府自我約束嘅行為,避免借出有爭議嘅書籍,認為唔會影響出版自由。佢又話,如果作者只為學術討論,並冇鼓吹推動分裂國家等政治目的就唔會有問題,而港區國安法亦唔會導致寒蟬效應,不過就冇補充已下架嘅書籍,存在咩政治目的係涉及煽動分裂國家或顛覆國家政權。

 

港語學發言人李志宏表示,「禁書」行為令到香港出版同言論自由已再三響起警號,明言圖書館藏書絕唔應該有政治審查,此舉將扼殺下一代嘅學術自由。

 

李志宏又指,香港書展即將開鑼,而康文署覆檢書籍並無明確準則,使參展書商紛紛自我審查,以避免誤墮法網。李志宏透露,已得悉部份出版社及作者被指因「政治敏感」等原因而被抽起該等書籍,可見《國安法》使紅色恐怖已進一步彌漫至香港嘅社會層面。