Now F1賽事直播講咗「武漢肺炎」廣東話評述遭暫停

8 7 月, 2020

早前，體育評述員陳恩能喺霍士體育台（Fox Sports）嘅世界一級方程式（F1）賽事旁述時，曾以「武漢肺炎」形容新冠病毒肺炎。事後，廣東話評述一度被下架，剩係設有英文旁述。而Now TV 母公司電訊盈科前晚就發表聲明，就陳恩能嘅不當言論而感到憤怒同遺憾，並且要求正視同交代事件。

七月五號，正正係F1複賽之後嘅首場賽事，喺奧地利舉辦。本地著名體育評述員陳能恩前晚就係Fox Sports旁述呢場比賽，曾以「武漢肺炎」形容新冠病毒肺炎。而比賽完結之後，車手訪問同頒獎嘅時段，陳恩能更加疑似係被提早「cut 咪」，據悉係同相關言論而接獲投訴有關。

電訊盈科隨後發表聲明，對於陳恩能嘅言論深表憤怒同遺憾，認為佢嘅言論極不恰當兼帶有歧視同誤導成份，又同Fox Sports表達不滿。Now TV 更曾一度將F1點播項目下架，重新上架嘅項目都剩係提供英語旁述，不設廣東話聲道。

陳恩能就係個人社交網站度發文表示，自己並唔知道自己喺直播期間畀人「cut 咪」。而任職Now TV或Fox Sports嘅評述員亦都表示，事發後並無收到任何有關公司嘅通知或者指引。

－－－－－－－－－－－－－－－

想知道更多有關港語學嘅資訊？請立即訂閱港語學telegram channel同Instagram，跟貼廣東話最新消息！