中央駐港國安公署徹夜改裝銅鑼灣維景酒店作為臨時辦公大樓,國安公署今朝大概7點喺本港開幕。中聯辦主任兼國安事務顧問駱惠寧、國安公署署長鄭雁雄、行政長官林鄭月娥、三名司長、紀律部隊首長、前行政長官梁振英及董建華、港區人大代表及民建聯主席李慧琼等均有出席。開幕儀式全程以普通話進行,林鄭月娥都用普通話致辭。

琴日開始警方已經喺維景酒店一帶嚴陣以待,大約30名軍裝警員喺附近巡邏戒備,並封鎖附近嘅車位,又設置水馬陣,成個銅鑼灣重兵佈防,工作人員喺凌晨時分,喺酒店一樓外牆掛上國徽,並喺酒店外放置多張紅色座椅。警務處處長鄧炳強深夜曾經到場視察。喺大約清晨5時,有大量傳媒聚集,警方封鎖酒店對出位置,又喺英皇道與銅鑼灣道交界設立採訪區。

駱惠寧致辭個陣表示,香港維護國安嘅執行機制依家已基本形成,作為中央政府嘅派出機構,國安公署會嚴格依法履行職責、接受監督,唔會侵害任何個人同組織嘅合法權益。佢形容,公署會成為「香港安全嘅使者」及「國家安全嘅守門人」,令香港告別「國安不防嘅歷史」,並且令一國兩制喺香港嘅實踐「不變形」、「不走樣」。亦批評一啲別有用心嘅反中亂港份子污名攻擊公署,強調內地有健全嘅法律制度同良好嘅法治環境,司法程序質量指標亦連續兩年喺世界銀行嘅營商環境報告中排名第一,又指好多外國人都認為中國係最令人安全感嘅國家。

國安公署署長鄭雁雄致辭時指,公署將堅決依法行使維護國安嘅職責,並依法加強與中聯辦、外交部駐港特派員公署及解防軍駐港部隊嘅工作聯繫。

林鄭月娥用普通話致辭,指港區國安法體現中央對香港特區嘅信任,落實過程需要探索同學習,認為中央有需要保留權力,處理極少數嘅案件。並表示期待同國安公署署長鄭雁雄嘅合作。

儀式喺早上9時前結束,現場工人陸續拆銅鑼灣道嘅大型水馬,解封路面。警方喺附近戒備加強保安,亦有採取封路及改道措施。

---------------

想知道更多有關港語學嘅資訊?請立即訂閱港語學telegram channel同Instagram,跟貼廣東話最新消息!

Telegram:https://t.me/gongjyuhok

Instagram:https://instagram.com/gongjyuhok/

Twitter:https://twitter.com/gongjyuhok

 

                           

作者介紹

Leave a Reply

avatar

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料

  訂閱  
提示