中國對新疆維族進行文化滅絕嘅手段似乎又準備複製到內蒙古自治區！內蒙古自治區通遼市蒙古族中小學將於9月1號開始，採用所謂雙語教學模式，即小學思想品德課、初中歷史、政治等課程採用漢語授課，放棄傳統嘅蒙語教學。此舉引發成千上萬蒙古族人嘅憤怒。近期，數千蒙古族人簽名要求內蒙教育廳停止雙語教學模式。

根據《自由亞洲電台》報導，近期有一封名為《要求對通遼地區蒙古族中小學雙語教學改革的政務公開的申請書》喺微信間熱傳。呢封致內蒙古教育廳嘅公開信就寫到，由今年9月1號開始喺通遼市蒙古族中小學施行新嘅雙語教學模式嘅消息，即小學思想品德課用漢語授課；初中歷史、政治課用漢語授課；從小學一年級開始使用漢族學生嘅教科書教漢語文課。

呢封公開信引發廣大農牧民喺內的蒙古各界人士高度關注，聯署者要求相關單位依據《中華人民共和國政府信息公開條例》同埋中共中央辦公廳、國務院辦公廳《關於全面推進政務公開工作的意見》等相關法規，將會喺學校推行雙語教學的計劃，公諸於眾，以保障民眾嘅知情權。

 報導引述旅居美國蒙古族人諾民（Nomin）說法表示，中國政府推行呢個計劃之前，從未向學校、教師、家長及學生徵求意見，因而引起強烈不滿，依家內蒙各地蒙古人正進行連署，反對呢次所謂嘅「雙語教學活動」，截至七號，簽名人數已超過4200人。

參與抗議嘅內蒙古著名異議人士哈達亦都表示，中國政府早就試圖改變百多年嚟蒙古人用漢文授課嘅習慣，特別係數理化等理科，但係每一次都遇到廣大蒙古人嘅強烈抗議而未能成功，唯獨喺文革期間成功過。

蒙古族人仲提供當地照片指，通遼市政府正喺度調查蒙古族學校老師入面，邊個能直接用漢語授課、能夠通過培訓、掌握漢語授課、同埋即使做培訓都唔能夠用漢語授課等，為即將嚟到嘅9月1號開學啟用雙語教學模式作準備。

旅居德國嘅南蒙古議會主席席海明表示，佢將全力維護家鄉民眾使用本民族語言嘅權利，誠如漢人有用漢語學習嘅權利，蒙古人都有用蒙語學習嘅權利，佢強調：「共產黨想剝奪我哋嘅權利，共產黨嘅呢種做法太瘋狂、野蠻。佢哋想喺文化上對蒙古人實行種族滅絕，呢樣違背佢哋所制定的憲法。」席海明表示，蒙古人為咗自己民族嘅生存，唔會屈服。佢希望家鄉嘅兄弟姐妹們堅持維護本民族嘅權利。

資料來源：https://www.rti.org.tw/news/view/id/2071223