曾稱浸大生抗普通話「絕對超錯」 馬浚偉:「今年九月我都讀浸大!」

2018年,浸大學生陳樂行、劉子頎等學生因抗議普通話試不公被停學,TVB藝人馬浚偉曾經落井下石出post批評唔夠「尊師重道」。今日(15號)馬浚偉又公開表示,九月將會入讀香港浸會大學,浸大學生都紛紛表示唔太歡迎。

當語文中心抗議學生遭停學後,馬浚偉喺批評學生對待老師無禮,指「那種無禮、那種凶惡、那種聯群結黨圍堵式的要挾和威嚇」令佢感到「又恨又痛」,並斥責學生嘅做法同態度「絕對超錯」。杜汶澤亦喺 facebook 發帖回應,指「見到咁多人出鬧學生嘅post,我先至信,Facebook 係廢中同廢老玩嘅」,暗指「出鬧學生嘅post」嘅人是「廢中」、「廢老」。他回應留言時進一步表態,稱「好多人唔知頭,唔知路,睇少少,一味屌,更加唔會體諒」。他又認為部分人以為自己「一世都無做過衰嘢」,「對其他人嘅道德要求好高」,甚至認為「學生嘅未來係屬於佢地自己嘅」。

就讀浸大中醫雙學士、前浸大中醫藥學會會長嘅陳樂行表示,據了解馬浚偉所讀嘅只係中醫基礎證書兩年制,「一般來講社會唔會當呢啲大學生。」對於馬浚偉表示希望深造繼續讀上去學士課程,陳樂行指,浸大中醫課程有一定嘅要求:「起碼都要讀過Bio(生物學)啦。」

記者翻查資料,浸大中醫基礎證書課程屬香港特別行政區政府資歷架構「第3級別」,相當於香港中學文憑。