廣州2010年曾經萬人上街撐廣東話? 毋忘7.25粵語日

2010年7月25日,廣州人不畏防暴警察強力打壓,萬人上街捍衛粵語。

呢件事未必會記載喺歷史教科書入邊,但每個母語係廣東話嘅人,點可以唔知?點可能忘記?

推普滅粵嘅十年

2000年,中國通過《国家通用语言文字法》。廣州市嘅各個政府,教育機構都規定要用普通話做主要語言,而本來嘅粵語被逐步削弱。

廣州部分中小學校甚至禁止學生喺校內講粵語,違例會被扣「道德操行分」,人稱話「講廿句粵語,三好學生無緣」。

另外,隨住越來越多新移民嘅遷入同推普政策嘅影響,廣東省有啲新移民唔單止拒絕學習粵語,甚至排斥同歧視粵語,稱粵語係「鳥語」、「唔係人話」,蔑稱廣東話人係「南蠻」、「猴子」。

雖然廣州人對推普政策都有所不滿,但由於係《国家通用语言文字法》係「全國性法律」,喺中央缺乏話語權嘅廣州人都冇機會發聲。

封殺粵語廣播 廣州人一朝醒覺

2010年6月,廣州市政協建議增加廣州市營電視頻道嘅普通話節目,變相減少粵語節目;而網上問卷內容更加係一面倒,激起廣州市民熱烈討論同不滿。當時超過八成人反對呢項提議,並且引發廣府話存廢嘅激烈討論。

喺2010年7月,廣州市政協委員紀可光正式向廣州市人民政府提交「關於廣州市營電視頻道全面改用普通話廣播」嘅提議,引起咗廣州市各界嘅強烈反對同批評。

同月有報道指廣州嘅執信南路小學要求學生喺課外時間都要講普通話,有受訪家長話學生如果被發現講粵語,就會被記名並交畀教師處理,甚至以扣分、「全校點名批評」作懲罰,令到佢個女唔敢講粵語,再係噉落去就連粵語都唔識講。

7月中,有市民發現明代名將袁崇煥喺東莞石碣故鄉紀念園嘅粵語口頭禪銘牌俾人鑿走。原來嘅金色銘牌上刻有佢打仗時嘅口頭禪「掉哪媽!頂硬上!」。終於,7月25號,廣州市民製作咗大量相關文宣,喺網上號召撐粵語集會,萬人遊行一觸即發。

廣州萬人上街撐廣州話翌日成為香港報章頭條(蘋果日報剪報)

無懼公安打壓 撐粵語兩萬人成行

廣州網民發起「80後捍衞廣州話行動」,原定7月25日下午5點半喺廣州海珠區江南西地鐵站外舉行,約定著白衫一齊撐粵語。

但喺活動舉行前夕,傳出活動發起人遭當局帶走問話,並定性為非法聚會,好多年輕人對活動是否成事深有疑問。「我而家喺江南西,但撐粵語啲人呢?我淨係見到啲差人!」有民眾昨日一早趕到現場,卻絲毫不見動靜,在網上留言時顯得心灰意冷。有人甚至在網上留言說:「江南西A出口,3點幾就有警察戒備,活動多數冇行!」

但到下午4點幾,白衫青年陸續出現,5點過後,年青人更從四面八方湧現。由於當局禁止集會申請,活動發起人用絲襪笠頭,分持抗議標語現身。

發起人表明,因當局禁止是次集會,故以散步形式舉行,並稱「堅持公民語言自由」。其中一個年青人話,絲襪笠頭係因為俾當局打壓,確實有人俾公安帶走問話,有人俾公安請去公費飲茶,被迫簽下「不參與活動保證書」。佢哋睇唔因唔過眼,但唔想公安搵佢哋麻煩,所以笠頭都要出來表達意見。他們批評當局將普通話當中國文化代表好荒謬,並認為當局「唔可以當粵語做推廣亞運嘅代價」。

五點半後,人數之多出乎當局意料。地鐵站對出兩條馬路都被佔領,導致兩條道路癱瘓,塞車超過一公里。活動最高峯時人數超過兩萬人。

本來口號本來相當斯文,不時齊喊「廣州話、廣州話」、「我愛廣州話」、「廣州話起錨」、以及「抵制煲冬瓜,我哋撐粵語」等,但公安不斷增派人手,更加有幾車戴頭盔嘅防暴公安到場築起人牆,並且企圖捉身穿敏感標語嘅人士同記者。群憤四起,向公安高叫:「掉那媽」、「公安收皮」!

現場參與嘅80後亦喺微博上直擊現況,初時有結他手高唱香港樂隊Beyond粵語歌曲《光輝歲月》,俾公安上前阻止,但被眾人以「掉哪媽」鬧走。一個青年穿着「言論無罪」T恤到場時,有公安上前企圖抓人,引發肢體衝突,或者發現有便衣公安偷拍時,廣州人怒吼:「放人!」「掉哪媽、頂硬上!」衝撞防線。

有大學生喺現場派問卷調查捍衞廣州話情況。香港電視台記者在場採訪俾公安查問時,都有大批年輕人上前制止,大叫「收皮」,趕走公安。活動6點半結束後,大部份參與者和平散去。

政府回應稱鬧劇 拘捕「造謠市民」

市政府發言人歐陽永晟7月28日市政府回應遊行指:「『推普廢粵』純屬子虛烏有;保護和發揚本土優秀文化同樣也是政府的重要責任;政協提案是民主政治的體現,程序、渠道合法,不能與”推普廢粵”這一偽命題劃上等號;對故意造謠惑衆、混淆視聽或非法聚衆的行徑,公安機關將依法依規予以嚴懲。」

廣州警方已將在互聯網上散佈「經公安機關批准,有兩萬人在某地聚集」謠言的違法嫌疑人余某行政拘留5天,並妥善處理「7·25」人員聚集事件。佢哋仲話「江南西地鐵A出口最高峰只聚集了數百人,警方前往現場維持秩序至人群逐漸散去,現場沒有發生任何衝突事件。」

歐陽永晟話:「廣州在建設現代化大都市過程中,必須有文化的自信與胸懷,這體現在對本土語言和習俗的選擇與堅持上,也包括對普通話的推廣與接納上。廣州依法依規依情依理都不會搞所謂”推普廢粵”,對此廣大市民和熱心人士完全可以放心。全國八大方言區至今都是完好無缺,粵語作為其中的一種,至今也是安然無恙。」

市民堅持行動 8月1香港廣州同步撐粵語遊行

8月1日,廣州一批網民發起撐粵語遊行,香港亦同步有遊行和應。

廣州喺人民公園發起嘅集會俾警方話係非法,全面封鎖公園。幾百名市民不斷向現場戒備的過百公安喝倒采,大叫「公安收皮」,間中有民眾高呼「廣州人講廣州話」的口號。現場公安阻止香港兩間電視台攝製隊採訪,連同現場幾個年青人一齊帶到附近臨時指揮中心問話。公安同市民有推撞,又話集會非法,增加到幾千名公安開始清場,又喺公園出入口把守,唔俾人進入。

但集會人士冇因此取消活動,遊行往北京路,沿途高叫「粵語萬歲」。遊行開始咗一個鐘後,公安突然架起鐵馬,欄阻遊行隊伍前進。群眾不滿,向公安掟水樽。警方上前諗住帶走部分民眾,又激起民眾情緒,雙方再度發生衝突。

同日下晝,有100人響應網上呼籲,著白衫喺灣仔修頓球場集合,並拉起橫額,遊行到灣仔警察總部,再到政府總部外集會。

喺外國工作嘅廣州人,喺網上得知廣州及香港同步粵語遊行,但他前一日去過廣州人民廣場,發現有好多公安,擔心廣州遊行搞唔成,於是來香港參加。

網上召集人蔡淑芳表示,今次遊行是聲援廣州嘅「散步運動」,因此喺香港申請遊行及集會。佢哋會堅持和平集會,保衞基本權利。

7.25粵語日

雖然自此對撐粵語活動嘅打壓陸續有來,但廣州人並冇將呢場運動忘記。

廣州民間本土文化網站羊城網,喺2014年7月25號倡議,將每年7月25日定為「粵語日」,籲所有粵語人一齊撐:「有你撐住,粵語一定唔會衰!」

喺2014年,廣東開始推動新一輪「規範語文」運動,上月底廣東電視台「正點新聞」改為普通話廣播;佛山更明令禁止政府機構、媒體、學校甚至餐廳等使用粵語和繁體字。

羊城網主編兼創辦人小勞表示粵語生存空間早在不知不覺間已縮得很窄:「廣州好多公共服務都唔提供粵語了;又比如我哋去吃飯買嘢,好多時只能講普通話,因為服務你嗰個,根本唔識聽。」

「好多學校將推行普通話誤解成『只能講普通話』。授課講普通話,甚至要求小朋友溝通、返屋企同家長都要講普通話……話擔心講得粵語多,會令普通話唔正。我認為係偏見,新一代廣州青年普通話水準絕對高過全國平均。」

內地微信由7月25日下晝起開始過濾粵語日相關訊息。被問到會否擔心受打壓,小勞說:「冇咩壓力,我哋又唔喺煽動大家做壞事。」

佢多次強調倡議與四年前萬民上街無關:「揀7.25呢個日子純粹心血來潮。粵語日唔係咩悲情日子,我希望可當成節日去慶祝。」

---------------
想知道更多有關港語學嘅資訊?請立即訂閱港語學telegram channel同Instagram,跟貼廣東話最新消息!
Telegram:https://t.me/gongjyuhok
Instagram:https://instagram.com/gongjyuhok/
Twitter:https://twitter.com/gongjyuhok