大學拒大陸生來港後 本地生得償宿位 住得近浸大都有Hall

浸大申請宿位嘅學生上月底收到通知,因應疫情關係,外地生喺第一學期未能來港,因此有更多宿位提供畀本地學生。浸大中文系嘅黃同學接受港語學訪問表示:「冇諗過會因禍得福,希望大陸學生上咗去唔好再落嚟!」

受訪同學感歎,香港大學留得好少宿位畀本地學生,今次獲分宿位簡直係不可思議。佢有朋友本來住大圍,返學只需20分鐘,本來以為自己一生與大學「Hall Life」無緣,但今年居然竟獲發宿位。

不過,大學都喺信函表示,今次需要學生再度申請第二學期嘅宿位。由於第二學期外地生可能回港,因此宿位又有可能變得十分少,所以決定住宿嘅同學都要有心理準備。

而且,學校都溫馨提示,宿舍隔籬起緊新宿舍,會有異味。而入住宿舍嘅同學更發現,每日八點都會俾隔籬打樁嘅聲音嘈醒。「不過唔洗踎喺屋企有得住宿舍見下啲女同學,呢啲都係好小事喇。」

---------------
想知道更多有關港語學嘅資訊?請立即訂閱港語學telegram channel同Instagram,跟貼廣東話最新消息!
Telegram:https://t.me/gongjyuhok
Instagram:https://instagram.com/gongjyuhok/
Twitter:https://twitter.com/gongjyuhok