美國國務院宣佈,要求孔子學院註冊做外交使團。國務卿蓬佩奧喺聲明指,措施目標係確保美國教育家同學校管理層能做出明智嘅選擇,諗下係咪繼續推進中國共產黨支持嘅項目:「美國希望係確保學生可以接觸到中國語言同文化嘅課程,但唔係俾中國共產黨同班黨羽操控。」

國務院負責亞太事務嘅助理國務卿史迪威(David R. Stilwell)表示,喺美國嘅孔子學院要登記晒啲人員同物業資料,買新樓都要美國政府嘅許可。史迪威話:「我哋唔係要佢哋全部收檔,我哋係要求佢哋話我哋知,佢哋喺呢度做緊啲乜嘢。」孔子學院仲需要定時向美國政府遞交包括財務、人員、營業資料嘅報告。

早前,美國國務院將九家中國傳媒列為「外國使團」,可見孔子學院同中國官媒都俾華盛頓認定為中國政府掌控嘅宣傳工具。孔子學院係中國教育部喺美國校園資助設立嘅文化中心,主要教普通話同中華文化;佢自稱非牟利教育組織,但資金來源主要來自中國教育部。

近年來,美國政界批評孔子學院係中國政府嘅宣傳機構,打壓校園言論自由和學術自由,甚至用嚟監控中國學生。目前,美國有75間孔子學院,其中65所同美國大學合辦,仲有約500個喺美國幼兒園至高中嘅孔子教室。2004年,美國第一間孔子學院喺馬里蘭大學成立,2017年高峰期有成一百間咁多,但隨後幾十間大專院校因擔憂孔院破壞學術自由決定停止合作。史迪威向記者舉例話,有美國高校因孔院反對而取消邀請西藏精神領袖達賴喇嘛前來演講;有校園演講人嘅簡歷上關於台灣的內容經孔院施壓後被移除。

同時,亦有人擔憂,美國學校目前普遍面臨外語培訓資金短缺,關閉孔子學院將令美國年輕一代接觸普通話同中華文化嘅渠道進一步減少。

孔子學院及中方未有回應。中國外交部之前話過,所有美國孔子學院都係美國大學自願申請,斥責華盛頓將孔院政治化係「典型的冷戰思維」。北京曾採取反制措施,報復美國定性中國官媒為外國使團,要求多家美國媒體上交在華人員及房產名單。

史迪威話,報復行動確有可能發生,仲話好多喺中國開分校嘅美國學校目前「都面臨運營困難」。今年1月,喺發展中國家做開義教英文嘅美國和平隊(Peace Corps)宣佈撤離中國,國會參議員盧比奧(Marco Rubio)當時發表聲明指,和平隊嘅決定證實中國唔再係一個發展中國家。今年7月,美國宣佈中止中國內地同香港嘅富布賴特(Fullbright)交流項目。該項目係由美國政府推動資助嘅國際教育、文化同研究交流項目。

---------------
想知道更多有關廣東話新聞資訊?歡迎喺Penana訂閱支持港語學專欄,Follow埋各大社交平台,跟貼廣東話最新消息!
Penana:https://www.penana.com/user/80736
Telegram:https://t.me/gongjyuhok
Instagram:https://instagram.com/gongjyuhok/
Twitter:https://twitter.com/gongjyuhok

港語學

                           

作者介紹

Leave a Reply

avatar

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料

  訂閱  
提示