民建聯立法會議員葛珮帆今日(17日)聯同「沙田議會監察」代表召開記者會,質疑沙田區議會審批活動撥款嘅準則模糊、不公。葛珮帆點名批評區議員李志宏身兼港語學發言人及青靜動力成員,斥港語學一直「鼓吹激進反中、反政府嘅言語」,但仍獲批近2萬2千元撥款舉辦廣東話徵文比賽等活動係涉嫌以公帑資助激進政治組織,將會向廉政公署及民政事務局反映。

葛珮帆斥現時區議會做法係「講唔通」。她強調申請活動「唔係好大筆錢」但都質疑僭建新撥款準則只係打壓建制派嘅藉口,「個聯繫係咩呢?可能有建制派前區議員做顧問董事,佢哋就唔批」。佢認為,沙田區議會涉嚴重濫用公帑,更有機會觸犯咗公職人員行為失當罪,會去廉政公署舉報,要求作出適切調查,並會約見民政局局長商討相關改善措施。

民建聯喺今日(17號)下晝到廉政公署「舉報」港語學

港語學主席陳樂行回應指,所有帳目公開透明,合符程序,「工作人員都係收超級友情價,有咩著數呀」。佢反駁港語學激進政治組織嘅指控:「廣東話係香港嘅法定語言,守護法定語言,發揚本地文學係天經地義呀。」佢批評葛珮帆嘅團體「唔好當區議會啲錢係老奉先得」,指港語學申請36萬撥款,都只獲批二萬二千蚊去搞兩個活動;沙田區議會籌辦團體眾多,競爭激烈,有個別建制派團體活動質素參差或受疫情影響不獲批,實屬正常,唔需要借題發揮。

對於葛珮帆指李志宏議員係港語學成員,有利益衝突。陳樂行回應指,李志宏係港語學嘅教育政策發言人,雖然唔會參與籌劃活動,但已經喺審核撥款時申報利益避席,因此更加唔係問題。


歡迎訂閱港語學文化頻道,每個月只需$38,持續支持港語學運作,全力為粵語文化事業打拼!

訂閱連結:https://www.penana.com/user/80736/


【徵文啟事】
「沙田故事」廣東話徵文比賽,旨在鼓勵沙田區嘅居民以至每一位港人喺紙上無拘無束地用廣東話描寫自己喺沙田區裡所經歷嘅「小城大事」,同時抒發屬於自己獨有嘅鄉土情懷。另外,喺動盪嘅社會背景下,想必香港嘅民眾都有不少故事和情感想分享,不論係喜樂交雜、抑或係悲憤相加嘅情感都可以透過沙田人嘅母語--廣東話躍然於紙上。

徵文體裁:
以香港沙田為故事背景嘅遊記,字數二千五百字為限;寫景、敘事、抒情皆可。

語文要求:
行文須用廣東話;全篇作品,能以廣東話流暢誦讀為宜。

參賽資格:
不限年齡,一律歡迎。

參賽費用:
全免

來稿辦法:
手寫稿件,恕不受理,只限電郵至 cantoncompo@gmail.com 。內文請註明姓名、筆名(如有)、出生日期、聯絡電話以及身份證號碼英文字母及首 3 位數字(例如: A123 )。

參賽作品須載於之 Microsoft Word 檔案,請加入附件,並以地區、參賽者姓名及作品標題命名(例如:沙田區_歐陽修《醉翁亭記》.docx)。字型須用大小為 12 之新細明體,且不得載有任何身分標記(例如作者姓名、筆名,所屬院校)。
資料不全或格式不符者,恕不受理。資料只供核對參賽者身分之用,並於比賽結束後一個月內銷毀。

參賽須知:
一) 嚴禁抄襲或冒名頂替。
二) 所有參賽作品必須為參賽者本人原創,且未經任何形式(例如報章、雜誌、博客、網上論壇及留言板)公開發表、演出或獲獎。
三)評審期開始前,參賽者不得以任何形式(例如報章、雜誌、博客、網上論壇及留言板)公開發表其參賽作品,或提交該作品至其他比賽。
四) 每人限投稿一次,首次提交之作品視為最終版本,後來版本恕不受理。
五) 比賽不設退稿,稿件請各位參賽者自行備份;
六) 提交參賽作品,視同參賽者授權本會使用及轉載該作品;日後結集出版,概不另行支付稿費。
七)本會有權取消違規者之參賽及得獎資格;失格者須全數歸還所獲獎金、獎狀及獎品;
八) 如有任何爭議,以本會決定為依歸。

比賽獎項:
冠軍:$1000書券及獎狀
亞軍:$800書券及獎狀
季軍:$600書券及獎狀
優異獎一名:$200書券及獎狀

重要日期:
2020年 10月30日 徵稿期結束
2020年 11月 初審與決審
2020年12月 公布賽果
2020年1月 頒獎典禮及朗誦表演

(中西區故事徵文比賽同步進行中,歡迎報名!)

港語學

                           

作者介紹

Leave a Reply

avatar

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料

  訂閱  
提示