浸會大學拒絕學生自由選科嘅訴求,一直強推普通話政策,聲稱係13年前因應僱主調查對畢業生普通話嘅能力而制定,為保障同學就業機會而硬撐普通話門檻。不過,市場唔係個諗,具強硬普通話政策嘅浸會大學及嶺南大學嘅失業率更屬十六年來最高,證明「普通話能力有助就業論」完全破產。

根據大學教育資助委員會披露嘅最新統計數字,八所政府資助大學一八∕一九學年畢業生失業人數為四百三十二人,失業率達百分之二點八,創十年新高。其中城市大學畢業生失業率百分之五點二,較去年高逾一倍,屬八大最高。

教資會資助大學每年均會統計應屆大學畢業生就業出路情況,早前公布最新有關一八/一九學年數字,合共一萬八千三百多人回應統計調查。數據顯示,截至去年底,八大去年畢業生失業人數共有四百三十二人,失業率達百分之二點八,創近十年來新高。此外,每周工作不足三十小時、從事兼職或臨時工嘅有八百零五人,就業不足率為百分之五點二,略高於前年嘅百分之五。

其中,城市大學畢業生失業人數一百二十九人,佔八大總數嘅三成,失業率及就業不足率屬八大最高,分別為百分之五點二及百分之十點三,同屬近十年新高。城大覆稱一直跟進這批畢業生情況,最新顯示當中不少人已成功就業,包括獲摩根士丹利、中國銀行和電訊盈科等大企業聘用。嶺南大學畢業生失業率有百分之四點五,比前年增加三點五倍;浸會大學雖然失業率為百分之二點九,在八大中未算高,但與嶺大一樣,情況屬十六年來最差;其餘大學則與往年相差不遠。

根據《兩文三語於工作及非工作情況的使用比較》,以5分為滿分,普通話喺工作環境嘅重要性只有0.66,遠比英文嘅1.34及廣東話嘅4.6為低。

#大學 #推普 #普通話畢業要求 #大學生 #失業 #失業率 #浸大 #嶺大

---------------

歡迎訂閱港語學文化頻道,每個月只需$38,持續支持港語學運作,全力為粵語文化事業打拼!
訂閱連結:https://www.penana.com/user/80736/
---------------

附:大學普通話政策破壞力評級

本會特約調查員偵知,唔少大學啲普通話畢業要求並未公諸入學簡介,萃萃學子隨時學費都交埋先發現自己被監人賴厚!特此為各校推廣普通話措施啲破壞力評一評級,供大家參考。

【災難】浸會大學

浸會大學有「普通話畢業門檻」,規定所有本科生必須修讀3學分嘅普通話課程,並且通過考試後方可畢業。不過,由於門檻飽受爭議,校方舊年決定推出「豁免試」,合格就可獲豁免。

不過,結果反映浸大出爾反爾,聲稱只考「基本溝通能力」嘅豁免試竟然僅三成人合格,試題被揭發難過國家語委考試。最近校方更用鐵腕手段,即時將抗議學生停學,拒絕佢哋上訴,引嚟全港嘩然。浸大學生公開呼籲,千祈唔好報讀該校,否則四年大學生活只會係折磨。

【嚴重】教育大學、嶺南大學

你喺中小學已經讀咗九年普通話會話,自然想喺大學學返啲高層次啲嘅嘢。不過,教大、嶺大就唔係咁諗。

教大所有課程要求都要求學生,喺普通話水平測試(PSC)中考獲至少三級乙等水平。如學生入學時能通過教大獨有嘅專上普通話測試(Tertiary Putonghua Test, TPT),就可獲豁免;否則,就要修讀由語文教育中心提供無學分普通話課程。

嶺大學生要讀6個學分「實用中文」課程。其中「聽」與「說」兩方面會以普通話進行。學生最多有兩次重修機會,或者可以考評核試,豁免讀實用中文。

【中等】科技大學、城市大學、理工大學

科大學生必須修讀3個學分嘅中文傳意課程,個課程其中一個目的係提升普通話聽講能力。經學生代表爭取後,只有口試會考普通話,而且佔分較少。

理大學生亦都一樣,要讀3個學分「中文語文及溝通課程」。經理大學生代表同校方檢討後,由2018年入學起,「中文語文及溝通課程」可自行選擇使用粵語或普通話上課。至於其他通識課程(Cluster-Area Requreiment),除非課堂講師收到同學的要求,否則主要預設由普通話授課(GEC1A49P、CBS2C04P、CC2C21P、FH2C05P),只有少數預設以粵語授課(例如:GEC1H16C、AMA1D01C、APSS1B14C)。

城大情況就好啲,佢哋要讀「中國文化-歷史與哲學」,而現時普通話班比例有所下調,仍然佔30%。

有趣嘅係,三間大學學生會都仿效浸大發起公投,爭取緊更多粵語教學嘅空間。相信以佢哋管理層唔會好似浸大咁強硬,會更願意同學生溝通,情況進一步改善。

【安全】香港大學、中文大學、公開大學

香港大學、中文大學,公開大學都無強逼學生讀普通話嘅規定。學生如有需要,可以自由報讀課程。

Penana:https://www.penana.com/user/80736
Telegram:https://t.me/gongjyuhok
Instagram:https://instagram.com/gongjyuhok/
Twitter:https://twitter.com/gongjyuhok

港語學

                           

作者介紹

Leave a Reply

avatar

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料

  訂閱  
提示