今日（28號）《信報》引述評論指，傳聞港交所總裁李小加有意競逐特首。評論分析指，特首林鄭月娥曾盛讚佢「能言善辯，說服力強，也很風趣」，願小加「在人生旅途的新軌道上再創高峰」；然而李小加嘅廣東話停留喺「識聽唔識講」水平，成為從政之路嘅一大障礙。

評論指，李小加參選嘅風聲喺佢2018年獲任命為全國政協委員時已有，亦喺佔中、反修例、國安法等議題多予己見，一反金融巨頭避談政見嘅常態。

該專欄作者金箴指，雖然會有「香港人點會接受到普通話特首？」嘅憂慮，但回歸前嘅港督都唔識粵語，所以「『普通話特首』未必不能獲得黃藍兩營接受」。

港語學發言人李志宏就反駁有關觀點，佢直言「無論黃藍都唔會接受『普通話特首』。港人治港係香港人嘅最基本要求，而唔識廣東話，好難稱得上係香港人。」李志宏又指，近九成香港人母語係廣東話：「唔識廣東話點樣聽取民意？點樣同絕大多數嘅市民溝通？」