北區區議員近日寫嘅議案引起熱話，皆因全文都用廣東話寫。喺《要求九巴重啟W3巴士線》嘅議案，粉嶺南選區張正皓議員就咁樣寫：「必須強調返，所有巴士線嘅目的都唔係俾乘客淨係前往總站而開設，故此總站設施，高鐵站未重開而唔能夠重啟，實屬笑話。」

喺《要求以百福田心遊樂場研究公園遊樂設施主題》，佢亦都係用粵語行文：「北區區內公園數目眾多，但係各個公園嘅辨識度都唔高，公園之間嘅分別就只有街名同設施唔同，完全無獨立嘅靈魂。而參考其他區，好似黃大仙鳳德公園咁就用花果山做主題。設施固然重要，但缺乏主題嘅支撐，就好似肉體缺乏靈魂，空有硬體而無軟體輔助嘅電腦，點靚都好，始終未能夠好好發揮。」

張正皓就喺佢嘅Facebook專頁用廣東話提議案嘅原由：「喺生活中用得到嘅地方都用粵語去表達，正正係保護粵語、傳承粵語嘅好方法。今日呢份提案，就係北區區議會嘅官方文件，用粵語寫成嘅官方文件，必須愈來愈多，先可以避免赤化。」

張正皓除咗係區議員外，亦都係一個本土作家。佢曾經喺補習學校任教中文長達5年，3年前因為想在香港嘗試「工作假期（working holiday）」轉行揸的士，亦曾以筆名「白告」在網上平台推出散文集「我的你的紅的」。

北區區議會一向都關注廣東話嘅傳承議題。北區中學校長會早前向北區區議會申請撥款，以舉辦「北區中學聯校普通話演講比賽」。蔣文正議員動議要求議員就該比賽語言表態，結果零票普通話，一票英文，一票客家話，其餘所有委員全投粵語。