香港浸會大學有開設文學碩士課程，俾學員進修中國文學，課程簡介註明授課語言「按授課教師情況及課堂性質使用普通話或廣東話授課」；但校園傳媒引述同學透露，入讀後發現唔單止各樣簡介會用普通話講解，所有科目原來都係用普通話授課。
該同學向香港浸會大學學生會編輯委員會表示，開學出席大學舉辦嘅迎新茶聚、圖書館與資訊科技簡介會，學校職員同教授都使用普通話介紹相關資訊。有同學出席修讀嘅七個科目，發現全部講師都係用普通話講書。
同學表示，擔心喺科科都係用普通話教學嘅情況下，母語係廣東話嘅學生Present嗰時會有不利，影響成績，亦都唔公平。佢表示，本地生都畀咗近十萬文嘅學費，但課程設計、運作有「貨不對率」嘅感覺。據了解，學員有一半係大陸學生。
有中文系職員回應浸大學生會編委會指，課程設計係用普通話講書，考試語言就由講師決定。職員又指課程相對較多大陸學生報讀，所以先用普通話講書同考試。本地同學就覺得講法係本末倒置：正正係課程以普通話為主迎合大陸學生，先搞到更加少本地生讀。