香港考試及評核局尋日舉行發布會公布「2020香港中學文憑考試(文憑試)等級預測研究結果」。研究計劃獲377間學校支持，統計36,900名考生校內同公開試嘅分數。研究顯示，英文科嘅公開試成績最易估，準確度達70.6％；而選修科就更加難估，尤其中國文學科準確度只有39.4，係各科中最低。

考評局指，四科主科，即中文、英文、數學、通識來講，佢哋都用校內成績估計嘅分數95%以上都喺相差一級，「可見核心科目嘅校內評估分數，基本上能反映學校考生在文憑試嘅大致表現。」

研究計劃旨在檢視以校內評核分數來預測學校考生於文憑試成績等級嘅準確程度；同時亦探討日後若一旦須取消公開考試，改為參考學校成績為考生預測公開試等級嘅可行性。

至於選修科目方面，因修讀人數較少、學校過去報考次數較少、歷年學校嘅文憑試成績波動較大等因素影響，整體預測成績嘅準確程度較核心科目略低。

考評局秘書長蘇國生博士表示：「呢次研究反映，目前按校內評估數據預測考生嘅文憑試成績，仍有唔少限制。因此，預測等級只會喺迫不得已取消公開考試時先會採用，屆時，我哋建議大學喺收生時應更彈性及參考考生其他相關表現嘅資料。」

考評局計劃喺未來每年進行預測等級研究，以蒐集更多校內評估數據，改善預測模型嘅設計，並提供更多具體回饋予學校，以增加校內評估嘅信度與效度。考評局將於稍後向參與學校發放學校報告，詳細列出各科目嘅預測結果，供學校及教師參考，以設計更能夠反映學生能力水平嘅校內評估。