9月28號被定為孔誕，中國政府喉舌新華社尋日喺評論批評美國國務卿蓬佩奧（Mike Pompeo）「希望美國大學內嘅孔子學院喺今年年底前全部收檔」嘅言論，更批評講法「妖魔化、污名化孔子學院漢語教學」，長此以往「搬起石頭砸自己的腳」。

蓬佩奧日前接受福斯財經（Fox Business）節目訪問時曾表示，孔子學院喺美國大學招募間諜同通敵者。佢話：「我諗所有人都會睇到孔子學院幾危險」、「我認為呢啲教育機構（美國大學）都會知幾危險，我希望我哋可以喺今年內收晒孔子學院檔。」

新華社評論指，2004年第一所孔子學院以來美國最多有百幾間孔子學院，但而家已經有45所大學關閉孔子學院，僅剩81所。新華社批評，美國反華政客全然不顧本國學員懷揣「藝多不壓身」嘅初衷學一門語言、求自我發展的願望，係典型嘅損人不利己。

文末重申近期流行嘅美國自損利益論，批評美國反華政客妖魔化、污名化孔子學院漢語教學嘅做法，係自縛手腳之舉，大大減少咗美國人了解中國嘅渠道。「長此以往，這種阻斷人文交流的惡果必然將損害中美互信，影響雙邊關係，搬起石頭砸自己的腳。」