搞蒙古展唔俾提蒙古話 法博物館終止與中國合作 館長:須捍衛人類道德科學價值觀

法國南特歷史博物館本來諗住喺出年2021年同中國內蒙呼和浩特博物館合作,搞成吉思汗為主題嘅蒙古展,但由於中國嘅審查每加掣肘,南特歷史博物館決定終止合作,自己同其他歐美博物館去做呢個蒙古展。館長話,面對中國中央政府嘅審查,為咗捍衛人類、道德、科學價值觀,決定要取消合作。

呢個蒙古展原定喺2020年今個月舉行,後來由於武漢肺炎推遲到出年上半年。南特歷史博物館館長畢爾堂·潔耶(Bertrand Guillet)話,中國當局一開始要求取消一啲用詞,例如唔俾提「成吉思汗」、「蒙古帝國」、「蒙古話」等。佢連要展覽標題改得模糊啲,由直接提蒙古帝國同成吉思汗,變成「天空和草原之子」。然之後,中國仲整咗個新嘅展覽大綱畀佢哋,要求控制包括文字、地圖、說明同場刊等所有嘢。

畢爾堂仲話,本來個展覽目的係要推廣蒙古文化,但中國就想攞嚟寫中國歷史,所以審查晒展覽嘅所有項目之後,否決咗個展覽。北京嘅國家文物局定咗新嘅展覽概要,「為嘅都係徹底消除蒙古嘅歷史同文化,改寫出國家嘅新故事」。

畢爾堂喺佢篇聲明《推遲成吉思汗展覽:博物館嘅倫理選擇》仲提到,今年夏天中國政府打壓蒙古少數民族,我哋不得不將展覽推遲到2024年。

本來南特歷史博物館打算借225件呼和浩特博物館嘅考古、藝術和地圖收藏,而家就借唔成。畢爾堂而家喺博物館歷史學家同專家嘅建議下,為咗佢哋一直捍衛緊嘅人類、科學同道德價值觀,決定停止呢場合作。佢哋打算同歐洲、美國嘅博物館重新合作,用返原本未經審查嘅方案,喺2024年再推出蒙古展。