全家得佢識粵語?郭富城請私人老師教返太太囡囡廣東話

郭富城日前出席銀行宣傳活動,講到小朋友因疫情停課,返唔到幼稚園。城城就話,已經請咗老師喺屋企教太太方媛同兩個囡囡廣東話同埋英文,培養佢哋嘅語文能力,因為成家淨係得佢識得講廣東話。

郭富城太太方媛係大陸女Model,因此曾被網民取笑做「國貨城」。佢自己則係好本土嘅香港人,細個喺筲箕灣土生土長,中小學都喺港島東讀書,喺九十年代起被譽為廣東歌嘅「四大天王」,掀起「勁歌熱舞」嘅潮流。

方媛自結婚之後,亦都的起心肝學廣東話。佢17年年尾喺社交網上傳一堆書本嘅相,其中包括「粵語教程」、「粵語速成初級教材」、「初學廣東話」以及「圖解廣東話」等等,睇嚟為咗學好廣東話方媛都花盡心思,佢更用廣東話留言說:「好多書呀,等我睇下(吓)先,Um…」網民睇到佢咁畀心機都表示支持,並留言介紹佢可以透過睇電視劇、電影等加快學習進度,有網民更笑言叫丈夫郭富城教她廣東話,咁樣進步先最大!

方媛為咗學好廣東話相當花心機(Instagram圖片)

喺2019年9月,示威者喺反送中集會解散後,遇見揸車塞喺銅鑼灣嘅郭富城,郭富城不慌不忙,解釋「我幫個女買尿片」。由於郭富城冇好似劉德華嗰啲撐政府或者撐修例,示威者態度相當友善,為佢高叫「幫郭富城開路」,等佢順利經過。最近杜汶澤「香港企硬」脫口騷,都特意提到「郭富城就梗係黃㗎啦!」。