深水埗區議會社區事務委員會今日（26號）開會，新一代嘅區議員冼錦豪、黃傑朗、李文浩、劉家衡就提出議案，要求深水埗區「普教中」情況同埋政府如何捍衛廣東話喺香港傳承。佢哋質問教育局有冇再做「普教中」嘅研究，點樣解決區內小學生粵語越嚟越差嘅亂局，以及建議民政處「畀啲資源出嚟搞一啲推廣粵語嘅活動，促進我哋深水埗街坊嘅粵語水平」。
佢哋引述統計指，深水埗區第 40 校網所有三十間小學入面，有七間小學全部班級都用普通話上中文堂，局部或者喺部分班級實施嘅小學亦都有九間，但由2016年嘅研究指出，「普教中」對學生學中文明顯無幫助，明顯見到宜家啲小朋友對廣東話嘅意識愈來愈薄弱，我哋更加要諗諗廣東話喺香港仲可唔可以繼續傳落去俾我哋嘅下㇐代。
教育局書面回應承認，「粵語是大部分本地人口的母語，香港社會主要使用粵語，對大部分人而言，在跟別人溝通和表達意見時，最有效的口語是粵語」。佢哋重申致力提升學生兩文三語能力，包括流行嘅粵語同普通話。
教育局指語常會喺2016年打後都冇再做「普教中」相關嘅研究，又話教育局一直都冇忽視學生喺粵語嘅學習，亦都會為老師提供培訓提升佢哋嘅專業知識。
議案全文：