中國足協最近又有新政策，要求中超球會嘅名字「中性化」，唔好再寫商業集團嘅公司名，搞到各間球會都諗爆頭，部份球會同球迷頗有微言，不過最終都惟有屈服。班霸廣州恒大率先改名做「廣州隊」，另一支廣州嘅廣州富力仍未決定新名，據報道一度改名做廣州藍獅，遭到中國足協否決，指「藍獅有貶義的意味」。
消息指，廣州富力本來申請使用「廣州藍獅」做「中性名」，因為富力會徽上面就係一隻藍色嘅獅子，但係引來唔少否定嘅聲音。有人話以前球壇已經出過隊廈門藍獅隊，此外足協中亦有人指藍獅二字嘅諧音「在粵語方言中亦有著貶義的意味」。本來富力仲有諗住改做「五羊」「廣州人」，又有唔少球迷反對聲音。據稱目前「廣州城」成為最接近廣州富力俱樂部改名嘅方案。
廣州富力嘅會徽正正就有兩隻藍色嘅獅子
有啲廣州人都不明所以，其實「藍絲」呢個字係香港社會環境孕育而成。根據《香港網絡大典》，「藍絲」係「藍絲帶」嘅簡稱，泛指由2014年「雨傘革命」起「反對佔領行動、支持警方從嚴執法」而將頭像轉成「藍絲帶」嘅人士。網民不滿佢哋盲目以暴易暴，有時將他們衊稱為「藍屍」。呢個詞傳到廣州以至全中國，又減低咗政治色彩，變咗低智代名詞。
典型「藍絲帶」facebook頭像
但廣東話本身都有一個知名同藍獅差唔多音嘅詞，就係「南獅」。南獅又稱醒獅或廣東獅，造型較為威猛，舞動時注重功架。南派獅舞以表演「文獅」為主，表演時講究表情，有搔癢、抖毛、舔毛等動作，惟妙惟肖，逗人喜愛。元宵節及其它重大活動裡舞獅子的習俗，以祈望生活吉祥如意，事事平安。而家藍絲竟然可以將藍獅變成中國嘅貶義詞，可見香港網絡文化潮流真係勢不可擋，影響深遠。
傳統廣東話意義上嘅「南獅」
中國足協上月召開中超俱樂部投資人會議，會上明確2021賽季各球隊嘅名稱必須中性化。會上指出，中超16球隊中，僅有「大連人」一隊符合名稱中性化的規定，其餘15隊都要改名。據報，球隊名不得含有股東、股東關聯方或實際控制人嘅字號、商號，亦不得使用諧音。
不過，有關規定引發爭議，日前包括國安、申花、泰達、建業和綠城球迷組織發布聯合聲明，抗議一刀切嘅做法，認為有損足球文化傳承。
據報北京國安已經向中國足協上書，希望可以保留「國安」兩字，因為佢哋由1992年成立起，已經使用國安為名字。
廣州恒大已率先改名，中文名改為廣州隊，而英文名則是GuangZhou FC，而且作為上市公司，廣州恒大已經發公告改名，變成「廣州足球俱樂部股份有限公司」，喺名字中刪去恒大及淘寶等字眼。
歡迎訂閱港語學文化頻道，每個月只需$38，持續支持港語學運作，全力為粵語文化事業打拼！
訂閱連結：https://www.penana.com/user/80736/
－－－－－－－－－－－－－－－
Penana：https://www.penana.com/user/80736
Telegram：https://t.me/gongjyuhok
Instagram：https://instagram.com/gongjyuhok/
Twitter:https://twitter.com/gongjyuhok