民建聯及自由黨對外都宣稱，唔覺得會威脅傳統建制派政黨。港區全國人大代表、民建聯葉國謙就回應指：「民建聯有人大委員，喺香港社會有行會成員，有立法會議員，目前政黨在立法會最多成員。背景來講，我唔覺得而家睇嘅紫荊黨有很大優勢。」

話雖如此，紫荊黨創辦人李山嘅言論對甚有威脅建制派嘅意味。佢上年底撰文指斥建制派政黨「無論是在組織協調、資源調配方面，還是在宣傳動員、議題設置方面，都與泛民派政黨顯示出很大的差距……長期脫離香港社會和民眾，未能把廣大香港市民『對美好生活的嚮往』作為本黨的奮鬥目標」。又不斷強調「要從根本上改變香港目前嚴重失衡的政治生態，就應該儘快成立新的愛國愛港政黨」。

建制派表面上妥協，實則對於紫荊黨嘅橫空出世甚為不滿，質疑唔識廣東話、唔識香港文化嘅紫荊黨人點可能同香港市民溝通，促進社會和諧。消息指，建制派成員曾經提出質疑指，紫荊黨嘅核心成員聲稱來港多年，但就冇學好廣東話，「學咩人從政？點可能同市民溝通到？唔好話市民唔妥，我哋建制派都唔服啦！」認為紫荊黨插手政壇會損害建制派喺上年區選至今努力經營嘅形象。

有分析指，「紫荊黨」成立半年後曝光，顯示中共唔再信任喺香港嘅傳統建制派，認為佢哋已經發揮唔到擁護政權嘅作用。即使最大建制政黨民建聯，喺中共眼中都太有地方主義色彩，唔係根正苗紅嘅自己人；估計中聯辦會削弱畀建制派政黨嘅資源，首當其衝將會係行政會議成員葉劉淑儀所屬嘅新民黨。