紫荊黨空降第一擊?傳李小加參選特首 唔識講廣東話成隱憂

早前傳出港交所總裁李小加有意競逐特首,而近日紫荊黨嘅空降,有分析指都係為同屬「海歸派」嘅李小加兵分兩路,為日後佔據行政、立法做鋪墊。李小加做過十年港交所,對香港政情民情亦熟悉。本地建制派最大嘅反對理由,就係佢唔識廣東話,質疑佢難以同香港市民溝通。

分析指,特首林鄭月娥曾盛讚佢「能言善辯,說服力強,也很風趣」,願小加「在人生旅途的新軌道上再創高峰」;然而李小加嘅廣東話停留喺「識聽唔識講」水平,成為從政之路嘅一大障礙。李小加可能早於18年獲任命為全國政協委員時已經鋪路選特首,因為佢喺佔中、反修例、國安法等議題多予己見,一反金融巨頭避談政見嘅常態。

評論員金箴就為李小加護航,指雖然會有「香港人點會接受到普通話特首?」嘅憂慮,但回歸前嘅港督都唔識粵語,所以「『普通話特首』未必不能獲得黃藍兩營接受」。

港語學發言人李志宏就反駁有關觀點,佢直言「無論黃藍都唔會接受『普通話特首』。港人治港係香港人嘅最基本要求,而唔識廣東話,好難稱得上係香港人。」李志宏又指,近九成香港人母語係廣東話:「唔識廣東話點樣聽取民意?點樣同絕大多數嘅市民溝通?」

據《南華早報》日前報道,一個新政黨名為「紫荊黨」於今年5月成立,創辦人為李山、黃秋智和陳健文,佢哋嘅背景都同李小加相似,被稱為「海歸派」。李山同黃秋智都喺大陸出世,喺海外名校畢業,有國際歷練,而家係香港財政界頂尖人物。陳健文係香港上市公司主席。3人都有密切內地關係,例如係政協委員等。