展覽廣東歌百年發展 迪子新演繹唱出轉變【精華演唱片段】

之前港語學喺梁顯利油尖旺社區中心舉行「首屆廣東歌歷史展——『油』然懷舊粵語歌唱日」,除咗有展板陳列歷史相片同廣東歌發展之外,喺開幕典禮仲邀請咗唱作歌手迪子,重新演繹40年代至90年代嘅經典廣東歌,廣東歌半世紀嘅演變活現耳前,在場嘅音樂人前輩都紛紛讚好。一齊睇下出爐嘅精華片段啦!

展板內容主要參考資深樂評人黃志華老師嘅研究《原創先鋒——粵曲人的流行曲調創作》,內容相當紮實,尤其罕有咁由百年前20年代起,介紹廣東歌唔同時期嘅發展。

 

黃志華感歎民間少有70年代以前廣東歌的歷史研究,或者認為早期廣東歌俗而不雅,「我好想為早期嘅廣東歌平反,無人去寫我就偏偏要寫」,於是就寫成咗《原創先鋒》一書,樂見今次用展板咁平易近人嘅形式去推廣廣東歌嘅早期歷史,希望可以喺其他社區繼續舉辦。佢亦都欣賞新一代歌手迪子嘅表演為廣東歌歷史注入活力,令到觀眾都樂在其中。

 

迪子喺今次展覽就自彈自唱,配合鋼琴演奏多首經典曲目,包括40年代電影歌曲《紅豆曲》、50年代時代曲《夜夜春宵》等十一首經典廣東歌。其中演奏《問我》同《一水隔天涯》時,迪子仲加入咗R&B嘅節拍同風格重新演繹,令人耳目一新,獲得在場觀眾唔少掌聲。

 

策展人陳樂行多謝油尖旺區議會贊助今次活動,尤其感謝新一屆區議會重視民間歷史展覽同活動,希望可以喺唔同社區繼續推廣廣東歌,等大眾更深入認識廣東歌嘅歷史文化。